مبینہ امریکی ڈرون حملے میں بیت اللہ محسود کی بیوی ہلاک

بیت اللہ محسود کے رشتے داروں کے مطابق یہ میزائل حملہ بیت اللہ محسود کے سسر مولانا اکرام الدین کے گھر پر کیا گیا۔ حملے میں دو میزائل داغے گئے، جن کے نیتجے میں گھر مکمل طور پر تباہ ہو گیا۔ اس حملے میں بیت اللہ محسود کے کئی قریبی رشتہ دار شدید زخمی بھی ہوئے ہیں۔ اب تک یہ واضح نہیں ہو سکا کہ حملے کے وقت محسود گھر میں موجود تھے یا نہیں۔ مقامی سیکیورٹی حکام کے مطابق حملے میں دو عسکریت پسند بھی ہلاک ہو گئے ہیں۔

القاعدہ سے قریبی تعلق رکھنے والے بیت اللہ محسود کے سر کی قیمت امریکہ نے پانچ ملین ڈالر لگا رکھی ہے۔ بیت اللہ محسود کے ایک قریبی رشتہ دار نے نام ظاہر نہ کرنے کی شرط پر خبر رساں ادارے روئٹرز کو بیت اللہ محسود کی اہلیہ کی ہلاکت کی تصدیق کرتے ہوئے بتایا کہ اس حملے میں چار بچے بھی زخمی ہو ئے ہیں۔ گزشتہ برس نومبر میں بیت اللہ محسود نےمقامی مذہبی عالم مولانا اکرام الدین کی بیٹی سے شادی کی تھی۔

رپورٹ : عاطف توقیر

ادارت : امجد علی