1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

لندن دہشت گردانہ حملے، بارہ افراد گرفتار

عاطف توقیر اے ایف پی
4 جون 2017

لندن میں ہفتے کی شب شہر کے مرکزی علاقے میں تین حملہ آوروں نے ایک وین کے ذریعے پیدل چلنے والوں کو نشانہ بنایا اور بعد میں چاقوؤں سے حملے کیے۔ ان واقعات میں سات افراد ہلاک جب کہ چالیس سے زائد زخمی ہو گئے ہیں۔

https://p.dw.com/p/2e6Ui
England Vorfall auf der London Bridge Mehrere Fußgänger angefahren
تصویر: Getty Images/C. Court

بتایا گیا ہے کہ یہ حملے جس مقام پر کیے گئے وہاں درجنوں بارز اور نائٹ کلب موجود ہیں اور ہفتے کی شب تفریح کے لیے اس علاقے کا رخ کرنے والوں کی تعداد بہت زیادہ تھی۔ ان حملوں کے بعد مسلح پولیس نے علاقے کو گھیرے میں لے لیا اور ان تینوں حملہ آوروں کو گولی مار کر ہلاک کر دیا۔ سکیورٹی حکام نے ان حملوں کے وقت اپنے ٹوئٹر پیغام کے ذریعے مقامی لوگوں کو ’بھاگنے، چھپ جانے اور بتانے‘ کی ہدایات جاری کی تھیں۔

یہ حملے ایک ایسے وقت میں ہوئے ہیں، جب آٹھ جون کو برطانوی عوام عام انتخابات میں اپنا حق رائے دہی استعمال کرنے والے ہیں۔ اس سے صرف دو ہفتے قبل برطانوی شہر مانچسٹر میں بھی ایک امریکی پاپ گلوکار کے کنسرٹ میں شریک افراد پر ہونے والے خودکش بم حملے میں 22 افراد ہلاک ہو گئے تھے۔ ہفتہ تین جون کو لندن میں ہونے والے اِن حملوں کی ذمہ داری فی الحال کسی گروپ یا تنظیم نے قبول نہیں کی ہے۔

London Bar Polizei Video
ان حملوں میں درجنوں افراد زخمی ہوئےتصویر: Reuters/Twitter

برطانیہ کی انسدادِ دہشت گردی پولیس کے سربراہ مارک روولے نے اپنے بیان میں کہا ہے کہ اس حملے میں چھ عام شہریوں کے علاوہ تینوں حملہ آوروں کو ہلاک کر دیا گیا ہے۔ انہوں نے بتایا کہ ان تینوں حملہ آوروں کے بارے میں اندازہ لگایا گیا تھا کہ انہوں نے خودکش جیکٹیں پہن رکھی ہیں، تاہم بعد میں یہ اندازہ غلط ثابت ہوا۔  لندن حملے میں ملوث ہونے کے شبے میں برطانوی پولیس نے بارہ مشتبہ افراد کو گرفتار کر لیا ہے۔ بتایا گیا ہے کہ آج بروز اتوار یہ گرفتاریاں لندن کے مشرقی علاقے سے کی گئی ہیں۔

برطانوی نشریاتی ادارے بی بی سی پر جاری کردہ ایک تصویر میں پولیس کے ہاتھوں ہلاک ہونے والے دو مبینہ حملہ آور دکھائی دیے، جنہوں نے اپنے جسم کے ساتھ مواد باندھا ہوا تھا۔ اس حملے کے کئی گھنٹے گزر جانے کے باوجود لندن کے اس مرکزی علاقے کی ناکہ بندی جاری ہے جب کہ علاقے میں مسلح پولیس اہلکار اور انسدادِ دہشت گردی فورس کے اہکار گشت کر رہے ہیں۔

لندن ایمبولینس سروس کے مطابق واقعے کے بعد چالیس سے زائد زخمیوں کو شہر کے تین مختلف ہسپتالوں میں منتقل کیا گیا ہے، جب کہ مریضوں اور ڈاکٹروں کی حفاظت کے لیے ان تینوں ہسپتالوں کے آس پاس بھی پولیس کی بھاری نفری تعینات ہے۔

یہ بات قابل ذکر ہے کہ یہ حملہ لندن کے مشہور پل اور بارو مارکیٹ کے علاقے میں پیش آیا، جہاں ہر طرف بارز اور ریستوران واقع ہیں اور ہفتے کی شب عموماﹰ یہ علاقہ لندن کے رہائشیوں سے بھرا ہوتا ہے۔