فیفا ورلڈ کپ: ڈرامائی کھیل کے بعد یوروگوائے سیمی فائنل میں

کھیل کے مقررہ وقت پر دونوں ٹیموں نے ایک ایک گول کر رکھا تھا لیکن اضافی وقت کےدوران بھی دونوں ٹیمیں کوئی گول کرنے میں ناکام رہیں، جس کے نتیجے میں پنالٹی شوٹ آوٹ پرمیچ کا فیصلہ کیا گیا۔

یوں تو میچ کے دوران کئی سنسنی خیز لمحات آئے لیکن اضافی وقت کے آخری لمحات یعنی 120 ویں منٹ میں یورو گوائے کے سٹرائیکر لوئیس سواریز نے اپنی ڈی کے اندر گھانا کے ایک یقینی گول کو ہاتھ سے روک کر میچ کا پانسہ پلٹ دیا۔ بعد ازاں انہیں ریڈ کارڈ دکھا کر میدان سے باہرکر دیا گیا اور گھانا کو پنالٹی سٹروک بھی دیا گیا۔ گھانا فٹ بال کے ورلڈ کپ میں تاریخ رقم کرنے کے قریب پہنچ کربھی دور ہو گیا کیونکہ گھانا کے سٹرائیکر گیان نے یہ قیمتی موقع ضائع کر دیا، جس کے نتیجے میں میچ کے فیصلے کے لئے پنالٹی شوٹ آؤٹ کا مرحلہ شروع ہوا۔ اس میں گھانا دو کے مقابلے میں چارپنالٹی ککس سے ہار گیا۔

اس میچ کی دلچسپ بات یہ ہے کہ فاؤل کھیلنے والے کھلاڑی سواریز، جنہوں نے آخری لمحات میں اپنی ڈی کے اندر ہاتھ سے فٹ بال روک کر کھیل کا رخ بدل دیا، اپنے فاؤل کے نتیجے میں یوروگوائے کے ’ہیرو‘ بن گئے ہیں۔

اس طرح افریقی ٹیم گھانا کا پہلی مرتبہ عالمی کپ کا سیمی فائنل کھیلنے کا خواب چکنا چور ہوا توجنوبی امریکی ملک یوروگوائے سیمی فائنل تک پہنچنے میں کامیاب ہوا۔ اگر گھانا یہ میچ جیت جاتا تو پہلی مرتبہ کوئی افریقی ٹیم، عالمی کپ مقابلوں کے سیمی فائنل میں جانے کا اعزاز حاصل کرتی۔

اس میچ میں گھانا کے کھلاڑی Sulley Muntari نے ہاف ٹائم کے آخری لمحات میں تیس میٹر دور سے ایک عمدہ کک لگا کر اپنی ٹیم کو برتری دلوائی جبکہ دوسرے ہاف کے دوران یوروگوائے کے کھلاڑی ڈیاگو فورلان نے 55 ویں منٹ میں یہ برتری ختم کر دی۔

پنالٹی شوٹ آؤٹ میں یوروگوائے کے گول کیپر Fernando Muslera نے دو گول روکے اور اپنی ٹیم کو آگے لے جانے میں اہم کردار ادا کیا۔

رپورٹ: عاطف بلوچ

ادارت: عابد حسین