فیس بک کے سربراہ سوکر برگ، ’تقریبا تمام دولت عطیہ کر دی‘

مارک سوکر برگ اور ان کی اہلیہ پرسیلا چَین نے کہا کہ انہوں نے یہ عطیہ اس لیے دیا ہے کیونکہ وہ اس دنیا کو بہتر بنانا چاہتے ہیں، جہاں ان کی بیٹی نے رہنا ہے۔ سوکر برگ کے مطابق ان کا عطیہ تعلیم، صحت اور مختلف ممالک میں معاشرتی ترقی جیسے منصوبہ جات پر خرچ کیا جائے گا۔ سوکر برگ کے فیس بک کے حصص کی موجودہ مالیت 45 بلین ڈالر کے قریب بنتی ہے۔

سوکر برگ کے بقول فیس بک میں ان کے حصص کا ننانوے فیصد حصہ ’چَین۔ سوکربرگ انیشی ایٹو‘ کو جائے گا۔ پرسیلا اور سوکربرگ نے کہا ہے کہ وہ دنیا کے بچوں کی آئندہ نسل کی بہتر نشوونما اور ترقی کی خاطر کچھ کرنا چاہتے ہیں، اسی لیے انہوں نے یہ فیصلہ کیا ہے۔ سوکر برگ کے بقول ان کی بیٹی کے پیدائش کے دن یہ اعلان ان کے لیے زیادہ جذبات کا حامل ہو گیا ہے۔

پرسیلا اور سوکر برگ نے اپنے اس نئے خیراتی منصوبے کا اعلان دراصل ایک ایسے خط میں کیا ہے، جو انہوں نے اپنی نومولود بیٹی کے نام لکھا۔ سوکر برگ نے یہ خط بعد ازاں اپنے فیس بک کے اکاؤنٹ پر بھی شائع کیا۔ سوکر برگ کے اس پیغام کو بے شمار لوگوں نے پسند کیا۔ ان میں معروف گلوکارہ شکیرا، کیلی فورنیا کے گورنر آرنلڈ شیواٹزنیگر، مائیکروسافٹ کے شریک بانی بل گیٹس کی اہلیہ ملینڈا گیٹس کے علاوہ کئی دیگر ممتاز اور معروف شخصیات بھی شامل ہیں۔

سوکر برگ نے منگل کے دن جاری کردہ اپنے اس پیغام میں اپنی بیٹی کی پیدائش کی خبر بھی عام کی۔ اگرچہ ان کی بیٹی ماکس کی پیدائش گزشتہ ہفتے ہوئی تھی لیکن انہوں نے اس خبر کو عوامی منظر نامے سے ابھی تک پوشیدہ ہی رکھا تھا۔ سوکر برگ اور ان کی اہلیہ کے بقول ان کی بیٹی کی پیدائش نے انہیں جینے کی ایک نئی امنگ دی ہے اور وہ اس خاص موقع پر اس کے لیے دنیا کو بہتر بنانے کی کوشش کریں گے۔

یہ امر اہم ہے کہ اپنے حصص کا ایک بڑا حصہ عطیہ کرنے کے باوجود اکتیس سالہ سوکر برگ عالمی سطح پر فیس بک کے انچارج کے طور پر ذمہ داریاں نبھاتے رہیں گے۔ انہوں نے خود کہا کہ وہ بہت سالوں تک اس سماجی رابطے کی ویب سائٹ کا چیف ایگزیکٹو رہنا چاہتے ہیں۔