فیس بُک نے ڈائریکٹر آف پرائیویسی مقرر کر دیا

کیلی فورنیا میں قائم کمپنی پالو آلٹو نے ایک بیان میں کہا ہے کہ ایرین ایگان اکتوبر کے وسط سے فیس بُک میں ڈائریکٹر آف پرائیویسی کا عہدہ سنبھال لیں گی۔ اس وقت وہ کووِنگٹن اینڈ برلنگ کمپنی میں وکیل برائے ڈیٹا سکیورٹی کی حیثیت سے کام کر رہی ہیں۔

فیس بُک کے منتظمین کا کہنا ہے کہ پرائیویسی، ڈیٹا سکیورٹی، غیر مطلوب پیغامات، سپائی ویئر، شناخت کے غلط استعمال اور صارفین کے تحفظ سے متعلقہ مسائل کے حوالے سے ایگان ریگولیٹری اور قانون سازی کا وسیع تر تجربہ رکھتی ہیں۔ بتایا گیا ہے کہ وہ فیس بُک کے واشنگٹن کے دفتر میں فرائض انجام دیں گی۔

فیس بُک نے پبلک پالیسی کے ڈائریکٹر کےعہدے کے لیے بھی نئی تقرری کا اعلان کیا ہے۔ اس حوالے سے لوئیزا ٹیریل بھی اکتوبر ہی میں ذمہ داریاں سنبھالیں گی۔ وہ امریکی صدر باراک اوباما کی معاون خصوصی برائے قانون سازی رہ چکی ہیں۔ ٹیریل بھی فیس بُک کے واشنگٹن آفس میں فرائض انجام دیں گی۔

فیس بُک نے برسلز میں اپنے نئے دفتر کے سربراہ کے لیے بھی تقرری کا اعلان کیا ہے۔ اس عہدے کے لیے ایریکا مَن کی خدمات حاصل کی گئی ہیں۔ ان کا تعلق جرمنی سے ہے اور وہ یورپین پارلیمنٹ کی سابق رکن ہیں۔ وہ یورپی اداروں کے ساتھ فیس بُک کی ترجمان کی حیثیت سے بھی کام کریں گی۔

خیال رہے کہ فیس بُک دنیا کی معروف ترین سوشل نیٹ ورکنگ سروس ہے اور اس کے صارفین کی تعداد سات سو پچاس ملین ہے۔

 

رپورٹ: ندیم گِل / خبر رساں ادارے

ادارت: امجد علی