شاہ رُخ خان نیویارک کے مادام تساؤ میں

اس موقع پر جمعرات کو ٹائمز اسکوائر پر واقع مادام تساؤ میوزیم میں ایک رنگا رنگ تقریب کا اہتمام کیا گیا، جس میں بالی وُڈ کی دھنیں بجائی گئی اور رقص بھی پیش کیا گیا۔

شاہ رُخ کا مجسمہ رکھے جانے کے پہلے روز ہی ان کی مداحوں کی ایک بڑھی تعداد وہاں پہنچ گئی۔

مادام تساؤ میوزیم کے ڈائریکٹر سیلز روزمر ڈیل اریڈو کا کہنا ہے، ’زیادہ سے زیادہ لوگ بالی وُڈ کے بارے میں جاننا چاہتے ہیں ، ان کی فلموں کو دیکھ رہے ہیں، یہ عام زندگی کا حصہ بن رہا ہے اور اسٹائل کا بھی۔‘

گزشتہ سال امیتابھ بچن نے نیو یارک کے مادام تساؤ میں جگہ بنائی اور اس سال شاہ رخ کا مجسمہ وہاں سجایا گیا۔ ابھی تک بالی وڈ کے دو ہی ستاروں کے مجسمے نیویارک کے اس میوزیم میں سجائے گئے ہیں۔

لندن کے مادام تساؤ میں بالی وُڈ اداکارہ اور سابق مس ورلڈ ایشوریہ رائے کا مجسمہ رکھا گیا۔ وہاں ان کے ساتھ امیتابھ بچن اور سلمان خان کے مجسمے بھی رکھے گئے ہیں۔

ڈیل اریڈو کے مطابق نیو یارک میں شاہ رخ کا مجسمہ رکھنے کی سب سے بڑی وجہ ان کے مداحوں کی پرزور فرمائش ہے۔ ان کا کہنا ہے کہ ویسے بھی نیو یارک میں بڑی تعداد میں ایشیائی نژاد لوگ رہتے ہیں اور شاہ رخ کو چاہنے والے لوگ بڑی تعداد میں وہاں موجود ہیں۔

رپورٹ: ندیم گِل

ادارت: عابد حسین