سابق پاکستانی وزیر خارجہ تحریک انصاف میں شامل

پاکستانی کرکٹ ٹیم کے سابق کپتان عمران خان کی تحریک انصاف جماعت میں شاہ محمود قریشی کی شمولیت کو پاکستان کے سیاسی حلقے ایک اہم واقعہ قرار دے رہے ہیں۔ قریشی کو اس برس کی ابتداء میں حکمران پیپلز پارٹی نے وزارت خارجہ کے عہدے سے ہٹا دیا تھا۔

تحریک انصاف میں شمولیت کا اعلان قریشی نے گھوٹکی کے علاقے میں عمران خان کے ہمراہ اپنے مریدوں کے ایک اجتماع سے خطاب کرتے ہوئے کیا۔ انہوں نے کہا، ’’میں اعلان کرتا ہوں کہ میں ایک ایسی تحریک میں شامل ہو رہا ہوں جو لوگوں کو انصاف دلانے کی جدوجہد کر رہی ہے۔‘‘

جلسے کے دوران شاہ محمود قریشی نے پاکستان پیپلز پارٹی کے شریک چیئرمین اور صدر پاکستان آصف علی زرداری پر بھی زبردست تنقید کی۔ قریشی کا کہنا تھا کہ صدر زرداری کی ایوان صدر میں موجودگی پاکستان کے جوہری پروگرام کے لیے ایک خطرہ ہے۔

اس موقع پر تحریک انصاف کے سربراہ عمران خان نے پاک افغان سرحد پر نیٹو فضائیہ کیے مبینہ حملے پر بھی تنقید کی اور کہا کہ پاکستان کو یہ معاملہ اقوام متحدہ کی سلامتی کونسل میں اٹھانا چاہیے۔ خیال رہے کہ ہفتے کو ہونے والے اس واقعے میں چوبیس پاکستانی فوجی ہلاک ہوئے تھے۔

عمران خان نے جلسے سے خطاب کرتے ہوئے کہا کہ ’’وقت آگیا ہے کہ پاکستان امریکہ کی جنگ سے علیحٰدہ ہوجائے۔‘‘

حالہ کچھ عرصے میں عمران خان کی جماعت تحریک انصاف کو عوامی سطح پر خاصی پذیرائی ملنا شروع ہوئی ہے۔ اس باعث ملک کی بڑی سیاسی جماعتوں کے بعض عہدیدار تحریک انصاف میں شامل ہو رہے ہیں۔

رپورٹ: شامل شمس⁄ خبر رساں ادارے

ادارت: ندیم گِل