سابق مصری صدر کی عدالت میں طلبی

سرکاری اخبار الاہرام نے وزیرِ داخلہ منصور العسوی کا ایک بیان شائع کیا ہے جس کے مطابق سابق مصری صدر حسنی مبارک کو قاہرہ کے مشرق میں واقع ایک عدالت میں پیش ہو کر اپنے اوپر عائد الزامات کا جواب دینا ہوگا۔ وزیرِ داخلہ نے تاہم یہ نہیں بتایا کہ مبارک عدالت میں کب پیش ہوں گے۔

اتوار کے روز سرکاری وکیلِ استعاثہ نے مبارک کے خلاف سمن جاری کیا تھا۔ حسنی مبارک پر حالیہ چند ماہ کے دوران مصر میں ہونے والے عوامی مظاہروں میں شریک افراد کو قتل کرنے اور سرکاری فنڈز میں غبن کرنے کے الزامات ہیں۔

خیال رہے کہ مصر میں معاشی اور سیاسی اصلاحات کے لیے ہونے والے وسیع عوامی مظاہروں نے حسنی مبارک کے کئی دہائیوں پہ محیط اقتدار کا خاتمہ کر دیا تھا اور اس کے بعد ملک میں ایک عبوری حکومت قائم کردی گئی تھی۔

اس بات کی کوئی اطلاعات نہیں ہیں کہ سابق صدر نے استغاثہ کی جانب سے جاری کردہ سمن کا کیا جواب دیا ہے۔ حسنی مبارک کے بیٹوں کے خلاف بھی سمن جاری کیے گئے ہیں۔

کئی ممالک مبارک اور ان کے خاندان کے اثاثے منجمد کر چکے ہیں۔ اقتدار سے بے دخلی کے بعد حسنی مبارک مصر کے سیّاحتی مقام شرم الشیخ میں مقیم ہیں اور ان کے اور ان کے خاندان کے بیرونِ ملک سفر پر پابندی ہے۔

مصر میں عوام کی جانب سے عبوری حکومت پر دباؤ ہے کہ وہ سابق صدر کے خلاف مقدمے کا آغاز کرے۔ اس ضمن میں حکومت متعدد اقدامات کر چکی ہے۔

رپورٹ: شامل شمس⁄ خبر رساں ادارے

ادارت: عصمت جبیں