حلب میں مشترکہ روسی امریکی آپریشن لیکن کس کے خلاف؟

روسی وزیر دفاع کا یہ بیان اس لیے حیران کُن ہے کیونکہ روس اور امریکا شامی تنازعے میں مختلف فریقوں کا ساتھ دے رہے ہیں۔ شوئیگو کے مطابق یہ مشترکہ آپریشن صرف حلب تک محدود ہو گا اور اس کا مقصد اس شہر میں امن لانا ہے تاکہ لوگ اپنے اپنے گھروں کو لوٹ سکیں۔

روسی سرکاری نیوز ایجنسی آر آئی اے نوووستی کے ساتھ باتیں کرتے ہوئے شوئیگو نے کہا:’’اپنے امریکی ساتھیوں کے ساتھ ہم آج کل مذاکرات کے ایک بہت ہی سرگرم مرحلے میں ہیں اور بتدریج ایک منصوبے کے قریب تر پہنچ رہے ہیں۔ مَیں ابھی صرف حلب کی بات کر رہا ہوں۔ اس منصوبے کی وساطت سے ہم مل کر وہ لڑائی شروع کر سکیں گے، جس کے نتیجے میں اس انتہائی بحران زدہ ملک کے اس شہر میں امن آ سکے گا اور لوگ اپنے اپنے گھروں کو واپس جا سکیں گے۔‘‘

شوئیگو کا کہنا تھا کہ ابھی بھی اس شہر میں سات لاکھ شہری رہ رہے ہیں۔ حلب پر قبضے کے لیے محصور باغیوں اور حکومتی فورسز کے درمیان لڑائی میں حال ہی میں باغیوں کو چند کامیابیاں ملنے کی خبریں آئی تھیں۔ حلب میں روسی طیارے اور حکومتی دستے باغیوں کے خلاف لڑائی جاری رکھے ہوئے ہیں۔

ٹی وی چینل ’رُوسیا چوبیس‘ نے روسی وزیر دفاع کا انٹرویو ہفتے کے روز ریکارڈ کیا تھا اور اسے نشر پیر کے روز کیا گیا ہے۔ اس میں شوئیگو نے الزام عائد کیا کہ باغیوں نے شہر کے مشرقی حصے میں لوگوں کو یرغمال بنا رکھا ہے اور اُس راستے پر بم نصب کر رکھے ہیں، جو روسیوں نے شہریوں کے بچ کر نکل آنے کے لیے رکھا ہوا ہے۔

دریں اثناء روسی وزیر خارجہ سیرگئی لاوروف نے اپنے جرمن ہم منصب فرانک والٹر شٹائن مائر کی حلب میں انسانی امداد کی فراہمی کے لیے تین گھنٹے سے زیادہ دیر کی فائر بندی کی تجویز کو رَد کر دیا ہے۔ لاوروف نے البتہ شٹائن مائر کے ساتھ جزوی اتفاقِ رائے کرتے ہوئے اس امر کا اعتراف کیا کہ روزانہ تین گھنٹے کی فائر بندی ناکافی ہے۔

صحافیوں سے باتیں کرتے ہوئے سیرگئی لاوروف نے کہا کہ فائر بندی کے دورانیے میں اضافے کے لیے ضروری ہے کہ دہشت گردوں کے خلاف جنگ میں درپیش مسائل کا حل نکالا جائے۔

لاوروف نے کہا کہ اگرچہ روزانہ تین گھنٹے کی فائر بندی کے نتیجے میں محصور انسانوں کے حالات بہتر ہوئے ہیں لیکن دوسری طرف اس کا فائدہ اٹھاتے ہوئے باغی اپنی نفری کو بڑھا کر سات ہزار تک لے جانے میں کامیاب ہو گئے ہیں جب کہ اسلحے اور گولہ بارود کی بھاری مقدار اس کے علاوہ ہے۔