جیون ساتھی کی طویل تلاش سے ’جیون متاثر‘

اس تحقیقی رپورٹ میں بتایا گیا ہے کہ ایک سے زیادہ خواتین کی موجودگی میں اپنے لئے بہتر جیون ساتھی کی تلاش میں بھٹکنے والے مردوں کے ٹوٹل لائف سپین میں تقریباً تین ماہ کی کمی واقع ہو جاتی ہے۔

جرنل ڈیموگرافی میں شائع ہونے والے اس تحقیقی رپورٹ کے مطابق جنس اور طویل العمری کے درمیان تعلق اس سے قبل جانوروں میں دیکھا گیا تھا۔ تاہم ایسا پہلی مرتبہ ہے کہ انسانوں پر بھی ان دونوں عوامل کے درمیان تعلق کے اثرات دیکھے گئے ہیں۔

اس تحقیق میں مصروف ہارورڈ میڈیکل سکول کے پروفیسر نکولس کرسٹاکِس کہتے ہیں:’’اگر آپ کو اپنا جیون ساتھی تلاش کرنے میں مشکلات پیش آ رہی ہیں، اس کا اثر آپ کی جسمانی صحت پر ہو گا۔ اس سے یہ تعین ہو گا کہ آپ کتنے سال زندگی گزاریں گے۔‘‘

اس تحقیقی رپورٹ میں مزید یہ کہا گیا ہے:’’ظاہر ہے مجموعی عمر سے تین ماہ کی کمی کوئی زیادہ اہمیت نہیں رکھتی تاہم یہ بالکل ایسا ہی ہے، جیسا روزانہ ایسپرین کی گولی کے استعمال کا جسم پر اثر۔‘‘

پروفیسر کرسٹاکِس کہتے ہیں:’’ایک 65 سالہ شخص عموماً مزید 15 برس جینے کا خواہشمند ہوتا ہے، ایسے شخص کی عمر سے تین ماہ کی کمی ہو، تو یقینا یہ کمی بہت زیادہ ہوگی۔‘‘

کرسٹاکِس سمیت یونیورسٹی آف وسکونسِن اور ہانگ کانگ کی چینی جامعہ کے سائنسدانوں کی مشترکہ تحقیق پر مبنی اس رپورٹ کے مطابق جتنا زیادہ یہ عمل غیر متوازن ہو گا، اتنے ہی زیادہ عمر پر اس کے اثرات بھی پڑیں گے۔

اس تحقیق کے لئے ونکونسِن یونیورسٹی سے 1957ء میں فارغ التحصیل ہونے والے چار ہزار سے بھی زیادہ طلبہ کی صحت کا ریکارڈ رکھا گیا۔ اس کے علاوہ طویل العمر افراد کے لئے حکومت کے پروگرام کے تحت چار ملین افراد کے ریکارڈ سے بھی اعداد و شمار اکٹھے کئے گئے۔

اس تقریباً نصف صدی تک جاری رہنے والی تحقیق سے یہ بات سامنے آئی کہ اس دور میں اپنے جیون ساتھی کی تلاش میں مشکلات کے شکار ہونے والے افراد کی عمر دیگر لڑکوں کے مقابلے میں کم رہی ہے۔

رپورٹ: عاطف توقیر/خبر رساں ادارے

ادارت: گوہر نذیر گیلانی