جوہری توانائی آج بھی تیل کا واحد نعم البدل ہے: البرادعی
18 اپریل 2011
جاپان میں 11 مارچ کے زلزلے اور سونامی کی وجہ سے شدید متاثر ہونے والے فوکوشیما ڈائچی جوہری پاور پلانٹ کو درپیش بحران کے باعث دنیا بھر میں جوہری توانائی کے حوالے سے تحفظات کا اظہار کیا جارہا ہے، تاہم بین الاقوامی ایٹمی توانائی ایجنسی (IAEA) کے سابق سربراہ محمد البرادعی کے خیال میں جوہری توانائی آج بھی قابل اعتماد ہے۔
اتوار 17 اپریل کو شروع ہونے والے دبئی گلوبل انرجی فورم کی افتتاحی تقریب سے خطاب کرتے ہوئے مصر سے تعلق رکھنے والے محمد البرادعی کا کہنا تھا: ’’آج، قابل اعتماد بجلی کے حصول کے لیے جوہری توانائی زمین سے حاصل کیے جانے والے تیل کا واحد نعم البدل ہے۔‘‘
گزشتہ برس نومبر میں IAEA کی سربراہی سے دستبردار ہونے والے محمد البرادعی نے تاہم اس بات کا اقرار کیا کہ فوکوشیما جوہری پاورپلانٹ کو درپیش صورتحال کی وجہ سے توانائی کے حصول کے اس اہم ذریعے پر اعتماد کو ٹھیس ضرور پہنچی ہے۔ انہوں نے فورم میں شریک حاضرین سے خطاب میں کہا کہ فوکوشیما کی صورتحال جوہری توانائی کے لیے ایک جھٹکا ضرور ہے، تاہم انہوں نے یہ امید بھی ظاہر کی کہ توانائی کے اس ذریعے پر اعتماد وقت کے ساتھ ساتھ دوبارہ بحال ہوجائے گا۔
IAEA کے سابق سربراہ محمد البرادعی اب مصر میں ایک اہم جمہوریت نواز شخصیت ہیں۔ سابق صدر حُسنی مبارک کی تین دہائیوں پر مشتمل اقتدار سے علیحدگی کے بعد البرادعی مستقبل کے صدر بھی بن سکتے ہیں۔
رپورٹ: افسراعوان
ادارت: شامل شمس