جنوبی بیروت کے لوگوں کو اسرائیل کا انتباہ

اسرائیل کی شدید گولہ باری اور فضائی حملوں کے باعث جنوبی لبنان کے اہم شہر ٹائر اور اطراف کے علاقوں میں امدادی کاروائیاں تقریبا معطل ہو کر رہ گئی ہیں۔اس وقت جنوبی لبنان میں ہزاروں اسرائیلی فوجیوں اور حزب اللہ ملیشیا کے درمیان شدید لڑائی جاری ہے۔

امدادی کارکنوں کا کہنا ہے کہ اسرائیلی بمباری کی وجہ سے اٹھنے والے دھوئیں کے بادلوں کی وجہ سے ہمیں مرنے والوں اور زخمی ہونے والوں کی تعداد کا اندازہ نہیں ہو پا رہا۔ ادھر آج اسرائیلی طیاروں نے جنوبی بیروت میں بین الاقوامی ائر پورٹ کے قریب ہنڈبل گرا کر عوام پر زور دیا ہے کہ وہ علاقہ خالی کر دیں۔

دوسری طرف آئندہ چند روز میں اسرائیلی فوج جنوبی لبنان میں 15 کلومیٹر کے اندر سیکورٹی زون بنانے کا منصوبہ بنا رہی ہے۔ اسرائیلی فوج کے ترجمان کے مطابق 6 سے 7 کلو میٹر کے اندر 20 دیہاتوں پر فوج کا قبضہ مکمل ہو چکا ہے اور ہم آئندہ چند دنوں میں پندرہ کلومیٹر کا علاقہ بالکل صاف کرنے میں کامیاب ہو جائیں گے۔

دریں اثنا آج ملیشیا میں اسلامی ممالک کی سب سے بڑی تنظیم OIC کے ہنگامی اجلاس میں اقوام متحدہ سے لبنان میں فوری اور بھرپور طریقے سے جنگ بندی پرعمل درآمد کرنے اور اسرائیل کے مجرمانہ کردار کی تحقیقات کرانے کا پر زور مطالبہ کیا گیا ہے۔