جماعت الدعوۃ کے خلاف حکومتی کارروائیاں جاری
12 دسمبر 2008جماعت الدعوۃ کے خلاف کارروائیوں کے خلاف ملک کی بعض سیاسی تنظیموں نے سخت احتجاج کیا ہے۔ جمعیت علماء اسلام اور کشمیر کمیٹی کے سربراہ مولانا فضل الرحمٰن نے حکومتی اقدامات کو ہدف تنقید بناتے ہوئے کہا کہ آٹھ اکتوبر دو ہزار پانچ کو مظفرآباد میں آنے والے زلزلے کے بعد جماعت الدعوۃ نے مثالی فلاحی کام کیا لیکن اس کے باوجود ان کے کارکنوں کو کبھی داد نہیں ملی، اور آج محض ایک شخص کے لئے اس تنظیم کے تمام کارکنوں کو گرفتار کیا جا رہا ہے۔
اس حوالے سے اسلام آباد حکومت کا کہنا ہے کہ وہ کالعدم لشکر طیبہ اور جماعت الدعوۃ کے بانی حافظ محمد سعید کے حوالے سے اقوام متحدہ کی سلامتی کونسل کے حالیہ فیصلے کے عین مطابق کام کرے گی۔
ادھر پاکستانی دفتر خارجہ میں پالیسی بیان جاری کرتے ہوئے وزیر خارجہ شاہ محمود قریشی نے کہا کہ درخواست کے باوجود بھارتی حکومت نے ممبئی حملوں میں کسی پاکستانی شہری کے ملوث ہونے کے حوالے سے اب تک اسلام آباد کو ثبوت فراہم نہیں کئے ہیں۔