جرمن صدر جنوبی کوریا میں

جرمن صدر یوآخم گاؤک اپنے اس دورے میں خطے میں امن کے لیے جنوبی کوریائی کوششوں میں تعاون کی پیش کش کے ساتھ وہ کوریائی عوام کو اِس امید کا پیغام بھی دیں گے کہ جنوبی اور شمالی کوریا کا انضمام ممکن ہے۔ صدارتی دفتر کے مطابق جنوبی کوریا مشرقی ایشیا میں جرمنی کا ایک اہم ساتھی ہے۔ اس دورے کے دوران جرمن صدر اپنی جنوبی کوریائی ہم منصب پارک گُن یے سے بھی ملاقات کریں گے۔

پیر کے روز جنوبی کوریائی صدر باقاعدہ طور پر بھرپور فوجی اعزاز کے ساتھ اپنے مہمان کو خوش آمدید کہیں گی۔ ذرائع کے مطابق گاؤک بدھ کے روز جنوبی اور شمالی کوریا کے مابین غیر فوجی زون دیکھنے کےبعد منگولیا کے لیے روانہ ہو جائیں گے، جہاں وہ جمعے تک قیام کریں گے۔

اس دوران گاؤک کے ہمراہ ان کی ساتھی ڈانیئیلا شاڈٹ اور متوسط درجے کے کاروباری اداروں کے نمائندے اور اقتصادی شعبے کے ماہرین بھی ہیں۔

آج اتوار کو سیئول پہنچنے کے بعد جرمن صدر ایک قدیمی شاہی محل کو دیکھنے گئے اور بعد میں انہوں نے چائے پی، جو اس ایشیائی ملک کی ثقافت ہے۔ یہ ان کا اس خطے کا پہلا دورہ ہے۔ اس دوران جہاں اقتصادی، ثقافتی اور تحقیق کے شعبے میں روابط کو فروغ دینے کی بات ہو گی وہیں اس علامتی دورے سے شمالی کوریا کو دوبارہ سے اتحاد کے حوالے سے ایک اشارہ بھی دیا جائے گا۔

گاؤک جنوبی کوریائی پارلیمان سے بھی خطاب کریں گے۔ جنوبی کوریا کی اقتصادیات سست روی کا شکار ہے اور اس تناظر میں گاؤک ’سائنس اور جدت‘ کے عنوان سے سیئول میں جرمنی اور کوریا کے مابین ایک اجلاس کا بھی افتتاح کریں گے۔ جرمنی جنوبی کوریا کا ایک اہم تجارتی ساتھی ہے جب کہ جرمن کمپنیوں کی شکایت ہے کہ اس ملک میں کاروبار کے حوالے سے قوانین اور ضابطے بہت تیزی سے تبدیل ہوتے ہیں۔

جرمنی کے انضمام کے پچیسویں سالگرہ کے موقع پرجرمن صدر یوآخم گاؤک کا ستر سال سے منقسم جزیرہ نما کوریا کا یہ ایک علامتی دورہ ہونا چاہیے لیکن حقیقتاً اس میں کاروبار مفادات کو ہی فوقیت دینے کے امکانات زیادہ دکھائی دے رہے ہیں۔