جرمن بنڈس لیگا میں وولفسبُرگ کو شکست

ہفتے کے روزکھیلے جانے والے ایک اہم میچ میں پوائنٹس ٹیبل پر موجود سرفہرست ٹیم وولفسبُرگ، شٹٹ گارٹ کے ہاتھوں ایک کے مقابلے میں چار گول سے شکست کھا گئی۔ نمبر ایک ٹیم کی اس شکست کے بعد ابھی چونکہ تین میچز کھیلے جانے باقی ہیں اس سیزن کے فاتح کی پوزیشن ابھی تک کھلی ہوئی ہے اور کوئی بھی ٹیم فتح کا تاج سر پر سجا سکتی ہے۔

وولفسبُرگ اور شٹٹ گارٹ کے درمیان کھیلے جانے والے میچ کی سب سے خاص بات یہ رہی کہ شٹٹ گارٹ کی جانب سے کئے جانے والے تمام چاروں گول ماریو گومِز نے کئے۔ ہفتے کے روز کل چھ میچ کھیلے گئے، انہی میں سے ایک میں بائرن میونخ کی ٹیم نے انرگی کوٹ بس کو ایک کے مقابلے میں تین گول سے شکست دی جبکہ ہیرتھا برلن نے بوخم کو صفر کے مقابلے میں دو گول سے ہرایا۔ اور یوں بائرن میونخ اور ہیرتھا برلن نے تین تین پوائنٹس حاصل کئے۔ دیگر میچوں میں آٹھویں نمبر پر موجود ہوفن ہائیم نے کولون کو صفر کے مقابلے میں دو گول سے شکست دی جبکہ ڈورٹمُنڈ نے کارلس روہےکے خلاف چار صفر سے کامیابی حاصل کی۔

ہفتے کے روز کھیلے جانے والے چھ میچوں کے بعد بنڈس لیگا پوائنٹس ٹیبل کی پہلی پانچ پوزیشنز کی صورتحال کچھ اس طرح ہے۔ وولفسُبرگ کی ٹیم 60 پوائنٹس کے ساتھ بدستور نمر ایک پر ، جبکہ ایف سی بائرن کے بھی 60 ہی پوائنٹس ہیں لیکن وہ نمبر دو پر ہے۔ ہیرتھا برلن 59 پوائنٹس کے ساتھ نمبر تین، شٹٹ گارٹ 58 پوائنٹس کے ساتھ نمبر چار جبکہ ڈورٹمنڈ 55 پوائنٹس کے ساتھ پانچویں نمبر پر ہے۔

آج اتوار کے روز جرمن بنڈس لیگا میں دو میچ کھیلے جائیں گے۔ پہلا میچ میونخ گلاڈباخ اور شالکے کے درمیان جبکہ دوسرا ویرڈر اور ایچ ایس وی کے درمیان کھیلا جائے گا۔