جرمنی کے زخمی بالاک فٹبال ورلڈ کپ سے باہر

انگلش فٹ بال کلب چیلسی کے مڈ فیلڈر اور جرمن قومی ٹیم کے کپتان کی فٹ بال ورلڈ کپ میں عدم شرکت کی تصدیق جرمن فٹ بال فیڈریشن نے پیر کے روز کر دی۔ میونخ میں جرمن فٹ بال فیڈریشن کے ڈاکٹر ہانس ولہیلم نے ان کے ٹخنے کا سکین کرنے کے بعد انہیں آٹھ ہفتوں تک آرام کا مشورہ دیا ہے۔ فیڈریشن کے مطابق 33 سالہ بالاک اس عرصے میں کسی ٹریننگ سیشن میں بھی حصہ نہیں لے پائیں گے۔

جرمنی کی طرف سے اس سے قبل تین مرتبہ عالمی کپ مقابلوں میں شرکت کرنے والے بالاک کی اس ورلڈ کپ میں شرکت کو غالبا ان کے کریئر کا آخری ورلڈ کپ قرار دیا جا رہا تھا۔ ہفتے کے روز ان کے ٹخنے کی ہڈی پر ضرب پڑنے کے بعد خیال ظاہر کیا جا رہا تھا کہ وہ ممکنہ طور پر چار ہفتوں تک ایک خصوصی پلاسٹر کے ساتھ ٹریننگ میں حصہ لیں گے اور اس کے بعد دوہفتوں تک وہ خصوصی طور پر بنائے گئے جوتے پہن کر عالمی کپ میں شرکت کر سکیں گے۔ تاہم ان کے ٹخنے کے مکمل چیک اپ کے بعد ڈاکٹروں نے اب اس امکان کو رد کر دیا ہے۔

بالاک کے آئندہ عالمی کپ مقابلوں میں شریک نہ ہونے کی خبر جرمن قومی فٹ بال ٹیم کے لئے ایک دھچکے سے کم نہیں ہے۔ ابھی سات مئی کو ہی جرمن کوچ Joachim Loew نے بالاک کو ورلڈ کپ کے لئے جرمن سکواڈ کا اہم رکن قرار دیا تھا۔

ہفتے کے روز بالاک کے زخمی ہونے کے بعد اپنے ایک بیان میں جرمن کوچ نے کہا کہ اگر بالاک ورلڈ کپ مقابلوں میں جرمن ٹیم میں شامل نہ ہو سکے تو قومی ٹیم کو شدید نقصان اٹھانا پڑ سکتا ہے۔ بالاک کے ٹخنے کا سکین ہفتے کے روز ہی ہونا تھا، تاہم ٹخنے پر شدید سوجن کے باعث اسے پیر تک کے لئے موقوف کر دیا گیا تھا۔

رپورٹ: عاطف توقیر

ادارت: مقبول ملک