بیس یورو کا نیا کرنسی نوٹ آ گیا
مرکزی یورپی بینک ابتدا میں آنے والے یورو کرنسی نوٹ بتدریج بدل رہا ہے۔ پانچ اور دس یورو کے بعد اب بیس یورو کے نئے کرنسی نوٹ جاری کر دیے گئے ہیں۔ توقع کی جا رہی ہے کہ ان نئے نوٹوں کی نقل تیار نہیں کی جا سکے گی۔
بدھ پچیس نومبر سے نیا نوٹ
یورو کرنسی کا اجراء تقریباً پندرہ برس پہلے عمل میں آیا تھا۔ گزشتہ دو برسوں سے مرحلہ وار ان کرنسی نوٹوں کو تبدیل کیا جا رہا ہے۔ بدھ پچیس نومبر سے بیس یورو کا نیا کرنسی نوٹ جاری کر دیا گیا ہے۔ مئی 2013ء میں پانچ یورو کا جبکہ ستمبر 2014ء میں دس یورو کا نیا کرنسی نوٹ جاری کیا گیا تھا۔ بعد میں بڑی مالیت کے نوٹ بھی تبدیل کر دیے جائیں گے۔
نئے اور پرانے کرنسی نوٹ ایک ساتھ
ابتدا میں نئے اور پرانے کرنسی نوٹ ایک ساتھ گردش میں رہیں گے۔ مرکزی یورپی بینک نے پرانے کرنسی نوٹوں کو مرحلہ وار واپس لینے کا پروگرام بنایا ہے۔ طویل المدتی بنیادوں پر پرانے نوٹ ادائیگی کے ذریعے کے طور پر اپنی حیثیت کھو دیں گے۔ ایسا کب ہو گا، مرکزی یورپی بینک کے صدر مایو ڈراگی اور اُن کی ٹیم نے ابھی یہ نہیں بتایا ہے۔ قومی بینک البتہ بعد میں بھی پرانے نوٹوں کے بدلے میں نئے کرنسی نوٹ فراہم کر دیں گے۔
بیس یورو کے جعلی کرنسی نوٹ سب سے زیادہ
بیس یورو کے جعلی کرنسی نوٹ سب سے زیادہ گردش میں ہیں۔ جرمنی میں ہر پانچ جعلی نوٹوں میں سے چار نوٹ بیس یورو مالیت کے ہیں۔ بیس یورو کے نئے کرنسی نوٹ میں ایسے متعدد نشانات محفوظ کیے گئے ہیں، جن کے ہوتے ہوئے اس کی نقل تیار کرنا کہیں زیادہ مشکل ثابت ہو گا۔
یورپی سیریز
مرکزی یورپی بینک نے یورو کے نئے کرنسی نوٹوں کو ’یورپی سیریز‘ کا نام دیا ہے۔ بیس یورو کے نئے کرنسی نوٹ کو محفوظ بنانے کے لیے ایک اہم علامت اس کا شفاف ہولوگرام ہے۔ اس کرنسی نوٹ کو روشنی میں رکھا جائے تو اس کی دونوں جانب ’یورپ‘ نامی اُس شہزادی کی تصویر نظر آئے گی، جس کے نام پر اس براعظم کا نام رکھا گیا تھا۔ یہ تصویر نئے کرنسی نوٹوں پر ایک سے زیادہ مرتبہ نظر آتی ہے۔
مزید خصوصیات
نئے کرنسی نوٹ کو محفوظ بنانے کے سلسلے میں ایک اور علامت بیس کا وہ ہندسہ ہے، جس کا سبز رنگ کرنسی نوٹ کا رخ تبدیل کیے جانے پر نیلا ہو جاتا ہے اور جس پر روشنی کی ایک لکیر حرکت کرتی دکھائی دیتی ہے۔ اس کے علاوہ نئے کرنسی نوٹ کے کناروں پر اور اوپر درمیان میں درج بیس کے بڑے ہندسے پر ایک ایسی تصویر ہے، جسے ہاتھوں سے چھو کر محسوس کیا جا سکتا ہے۔
رنگا رنگ کرنسی نوٹ
بظاہر نئے کرنسی نوٹ میں کچھ بدلا نظر نہیں آتا۔ پرانے نوٹ کی نیلاہٹ کچھ پھیکی تھی اور اُس کی پشت پر پیلا رنگ بھی نہیں تھا۔ نئے نوٹ پر ’یورو‘ کا لفظ لاطینی اور یونانی زبانوں میں ہی نہیں بلکہ کریلک میں بھی درج ہے۔ اسی طرح مرکزی یورپی بینک کا مخفف ECB بھی، جو اب تک پانچ زبانوں میں درج ہوتا تھا، نئے کرنسی نوٹوں میں نو زبانوں میں لکھا ہوا ملے گا۔
فن تعمیر پر خصوصی توجہ
یورو کے کرنسی نوٹوں میں شروع سے فنِ تعمیر پر خصوصی توجہ مرکوز کی جاتی رہی ہے۔ یہ سلسلہ نئے نوٹوں میں بھی جاری رکھا گیا ہے۔ نئے نوٹوں میں بھی مختلف ادوار کے تعمیراتی شاہکار پیش کیے گئے ہیں۔ بیس یورو کے نئے نوٹ پر بھی گوتھک طرزِ تعمیر ہی کا ایک نمونہ نظر آتا ہے۔
کاغذ کی بجائے روئی کا استعمال
ابتدائی طور پر بیس یورو کے 4.5 ارب کرنسی نوٹ جاری کیے گئے ہیں۔ فی کرنسی نوٹ آٹھ سینٹ کے حساب سے ان کی تیاری پر 360 ملین یورو کی لاگت آئی ہے۔ ان نئے کرنسی نوٹوں کو کوئی بھی ’پیپر منی‘ نہیں کہہ سکے گا کیونکہ یہ سُوتی ہیں اور روئی کو ایک خاص عمل سے گزارنے کے بعد اُس سے تیار کیے گئے ہیں۔
سترہ ارب کرنسی نوٹ
یورو مشترکہ یورپی کرنسی ہے، جسے یورپ کے اُنیس ملکوں کے تقریباً 340 ملین انسان ادائیگی کے لیے استعمال کرتے ہیں۔ آج کل تقریباً سترہ ارب کرنسی نوٹ گردش میں ہیں، جن کی مجموعی مالیت تقریباً ایک ہزار ارب یورو بنتی ہے۔