بھارت میں امریکی سفیر، روئمر کی جانشین پاول
17 دسمبر 2011بھارت میں امریکی سفیر کا عہدہ اس سال اپریل سے خالی تھا۔ نینسی پاول پاکستان اور نیپال میں امریکی سفیر کے فرائض انجام دے چکی ہیں۔ سفارتی حلقوں میں انہیں ایک ’کیریئر ایمبیسیڈر‘ قرار دیا جاتا ہے۔ یہ اعزاز بہت کم اور صرف ایسے سفارتکاروں کو دیا جاتا ہے جنہوں نے اعلیٰ سفارتی عہدوں پر نمایاں خدمات انجام دی ہوں۔
نینسی پاول کی بھارت میں نئے سفیر کے طور پر تقرری سے متعلق اپنے ایک بیان میں امریکی صدر اوباما نے کہا کہ وہ اپنے وسیع تجربے کے ساتھ بھارت میں سفارتی ذمہ داریاں بہت اچھے طریقے سے انجام دے سکیں گی۔
ماضی میں سفارتکاروں کی تقرری کے حوالے سے امریکہ کے کئی صدر زیادہ تر سیاست دانوں کو ہی نئی دہلی میں واشنگٹن کے سفیر مقرر کرتے رہے ہیں تاکہ دونوں ملکوں کے درمیان تعلقات کی اہمیت کو سیاسی طور پر مزید نمایاں کیا جا سکے۔
تاہم اس مرتبہ صدر اوباما نے ایک تجربہ کار اور پیشہ ور سفارتکار کی تقرری کو ترجیح دی ہے۔ باراک اوباما نے اس سے پہلے امریکی کانگریس کے ایک سابق رکن ٹموتھی روئمر کو بھارت میں امریکی سفیر مقرر کیا تھا۔
انہوں نے اس سال مارچ میں اپنے عہدے سے استعفیٰ دے دیا تھا۔ ٹموتھی روئمر نے اپنے استعفے کی وجہ یہ بتائی تھی کہ انہوں نے اپنی تقرری کے وقت صرف اس بات پر اتفاق کیا تھا کہ وہ محض دو سال کے عرصے تک بھارت میں امریکی سفیر کے فرائض انجام دیں گے۔
رپورٹ: عصمت جبیں
ادارت: عاطف بلوچ