بھارتی کشمیر میں چار ’پاکستانی‘ جنگجو ہلاک

خبر رساں ادارے اے ایف پی نے بھارتی فوج کے حوالے سے پچیس ستمبر بروز پیر بتایا ہے کہ بھارتی فوج نے پاکستان اور بھارت کو تقسیم کرنے والی لائن آف کنٹرول کے قریب ہی متعدد کارروائیوں میں چار مشتبہ جنگجوؤں کو ہلاک کر دیا ہے۔

پاکستان نے دنیا کو دہشت گرد، بھارت نے ڈاکٹرز دیے، سشما سوراج

بھارتی بمباری سے کم از کم چھ پاکستانی ہلاک، 26 زخمی

کشمیر میں دو مشتبہ علیحدگی پسند ہلاک، بھارتی پولیس

اے ایف پی نے بھارتی پولیس اور مقامی آبادی کے حوالے سے بتایا ہے کہ ہفتے کے دن مخبری کی گئی تھی کہ لائن آف کنٹرول پر کچھ مشتبہ مسلح جنگجو موجود ہیں، جس کے بعد بھارتی سکیورٹی فورسز نے سرچ آپریشن شروع کر دیا۔

پولیس نے بتایا ہے کہ تین مختلف علاقوں میں چھاپوں کے دوران سکیورٹی فورسز اور جنگجوؤں کے مابین فائرنگ کا تبادلہ شروع ہوا۔ بتایا گیا ہے کہ تین مشتبہ جنگجو ہفتے کے دن تین مختلف مقامات پر رونما ہونے والی جھڑپوں میں مارے گئے۔ ایک کارروائی بھارتی زیر انتظام کشمیر میں واقع ایک مسجد کے قریب بھی کی گئی۔

پولیس کی طرف سے جاری کیے گئے بیان کے مطابق، ’’تینوں جنگجوؤں کو ہلاک کرنے کے بعد معلوم ہوا کہ وہ پاکستانی تھے۔ بھارتی سکیورٹی فورسز نے ایک بڑے دہشت گردانہ حملے کو ناکام بنا دیا ہے۔‘‘

بھارتی فوج کے ترجمان کرنل راجیش کالیا نے اے ایف پی کو بتایا ہے کہ چوتھے جنگجو کی ہلاکت اس علاقے کے سرچ آپریشن کے دوران اتوار کو ہوئی۔ انہوں نے کہا کہ ان جھڑپوں کے نتیجے میں چار شہری اور ایک فوجی بھی زخمی ہوا۔

یہ امر اہم ہے کہ بھارتی حکومت الزام عائد کرتی ہے کہ لائن آف کنٹرول کو عبور کرتے ہوئے پاکستانی میں موجود جنگجو بھارتی کشمیر میں حملے کرتے ہیں۔ تاہم پاکستانی حکومت ان الزامات کو مسترد کرتی ہے۔ اسلام آباد حکومت کا کہنا ہے کہ وہ کشمیریوں کی مزاحمت میں انہیں صرف سفارتی مدد و تعاون ہی فراہم کرتی ہے۔

سن انیس سو نوے کے بعد سے بھارتی زیر انتظام کشمیر میں شروع ہونے والی کشمیریوں کی مزاحمت اور سکیورٹی فورسز کی کارروائیوں کے نتیجے میں تقریبا ستر ہزار افراد ہلاک ہو چکے ہیں۔ اس متنازعہ علاقے پر پاکستان اور بھارت دونوں ہی اپنا حق جتاتے ہیں جبکہ اس معاملے پر دونوں جوہری طاقتوں کے حامل ممالک تین جنگیں بھی لڑ چکیں ہیں۔