1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

بون کانفرنس: ’پاکستان کا جرمنی سے کوئی اختلاف نہیں‘

5 دسمبر 2011

بون میں افغانستان کانفرنس کی رپورٹنگ کے لیے آنے والے معروف پاکستانی صحافیوں حامد میر، سلطان محمود حالی اور شوکت محمود پراچہ نے کہا ہے کہ بون کانفرنس کے بائیکاٹ کی وجہ یہ نہیں کہ پاکستان کا جرمنی کے ساتھ کوئی اختلاف ہے۔

https://p.dw.com/p/13MfQ
پاکستانی صحافی حامد میر ڈوئچے ویلے کے شعبہء اردو میں
حامد میر شعبہء اردو میںتصویر: DW

بون کانفرنس سے وابستہ کی جانے والی توقعات کے موضوع پر ڈوئچے ویلے ریڈیو کے شعبہء اردو کے ایک خصوصی پروگرام میں اظہارِ خیال کرتے ہوئے ان صحافیوں کا کہنا تھا کہ پاکستان کی جانب سے کانفرنس کے بائیکاٹ کا فیصلہ صرف اور صرف نیٹو کی اُس فضائی کارروائی پر احتجاج کرتے ہوئے کیا گیا ہے، جس میں پاک افغان سرحد پر واقع دو پاکستانی چوکیوں پر موجود چوبیس پاکستانی فوجی ہلاک ہو گئے تھے۔

جیو ٹی وی کے مشہور پروگرام ’کیپیٹل ٹاک‘ کے میزبان اور ممتاز کالم نگار حامد میر نے کہا کہ پاکستانی فوجی قیادت کے خیال میں یہ حملہ جان بوجھ کر کیا گیا، جس کا مقصد پاکستان سے اپنی مخصوص شرائط منوانا تھا اور بون کانفرنس میں عدم شرکت کا مقصد امریکہ کو یہ پیغام دینا ہے کہ پاکستان اِس دباؤ کو تسلیم نہیں کرے گا۔

امریکی وزیر خارجہ ہلیری کلنٹن افغانستان کانفرنس میں شرکت کے لیے بون میں
امریکی وزیر خارجہ ہلیری کلنٹن افغانستان کانفرنس میں شرکت کے لیے بون میںتصویر: dapd

ٹھیک دَس سال پہلے افغانستان میں امریکی پیشقدمی اور طالبان حکومت کے خاتمے کے فوراً بعد دسمبر 2001ء میں بھی بون کے قریب پیٹرزبرگ ہی کے مقام پر ایک بڑی بین الاقوامی افغانستان کانفرنس منعقد کی گئی تھی۔ اُس کانفرنس کے نتیجے میں افغانستان میں ہزارہا غیر ملکی فوجیوں پر مشتمل بین الاقوامی محافظ دستہ آئی سیف تعینات کیا گیا تھا۔ اب دَس برس بعد افغانستان سے ان ہزاروں فوجیوں کے انخلاء کے پروگرام بن رہے ہیں۔

تاہم پاکستان ٹیلی وژن سے وابستہ صحافی سلطان محمود حالی نے کہا کہ پاکستان خطے میں امن کوششوں کے حوالے سے ایک اہم فریق ہے اور بون کانفرنس میں اُس کی غیر موجودگی سے خطّے میں امن کوششوں کو لازمی طور پر دھچکہ پہنچے گا۔

افغان صدر حامد کرزئی علامتی طور پر بون کانفرنس کی میزبانی کر رہے ہیں
افغان صدر حامد کرزئی علامتی طور پر بون کانفرنس کی میزبانی کر رہے ہیںتصویر: dapd

ٹیلی وژن ہی کے لیے کام کرنے والے ممتاز صحافی شوکت محمود پراچہ نے کہا کہ مغربی دُنیا دَس سال کی جنگی کارروائیوں کے بعد جان گئی ہے کہ اِس تنازعے کا حل جنگ کے ذریعے نہیں بلکہ صرف مذاکرات ہی کے ذریعے ممکن ہے۔

ان صحافیوں کا یہ بھی کہنا تھا کہ جب تک افغانستان میں امریکہ کے فوجی اڈے موجود رہیں گے، وہاں امن قائم نہیں ہو سکے گا۔ مزید یہ کہ پاکستان بلاشبہ چند ایک طالبان عناصر کے ساتھ رابطے میں ہے اور اپنے اثر و رسوخ کو استعمال کرتے ہوئے افغانستان میں دیرپا امن کے سلسلے میں اپنا کردار ادا کر سکتا ہے۔

رپورٹ: امجد علی

ادارت: افسر اعوان