بنڈس لیگا کا بارہواں میچ ڈے مکمل
9 نومبر 2009اتوار کے مقابلوں میں سے پہلے ہینوور کا سامنا ہیمبرگ سے ہوا۔ آخری لمحات تک ہیمبرگ کو دو ایک سے برتری حاصل تھی، تاہم ہینوور نے پینلٹی کِک پر گول کر کے میچ برابر کر دیا۔ دوسرے میچ میں کولون نے برلن کو صفر کے مقابلے میں ایک گول سے ہرا دیا جبکہ بریمن اور ڈورٹمنڈ کے درمیان آخری میچ ایک ایک گول سے برابر رہا۔
بارہویں میچ ڈے کے پہلے روز جمعہ کو صرف ایک میچ کھیلا گیا، جس میں بائر نے آئنٹراخٹ کو صفر کے مقابلے میں چار گول سے ہرایا۔
میچ ڈے کے دوسرے روز ہفتہ کو پانچ میچ کھیلے گئے۔ بائرن میونخ اور شالکے کے درمیان کھیلا گیا پہلا میچ ایک ایک گول سے برابر رہا۔
میچ کے آغاز سے بائرن میونخ کے کھلاڑی حاوی رہے۔ تاہم شالکے کی جانب سے جواں سالہ یوئیل ماتیپ نے فیصلہ کن گول کر کے اپنی ٹیم کو شکست سے بچا لیا۔
دوسرے میچ میں وولفس برگ نے ہوفن ہائیم کو ایک کے مقابلے میں دو گول سے ہرا دیا۔ فرائبرگ نے بھی بوخم کو دو ایک سے شکست دی۔ مونشن گلاڈباخ اور شٹٹ گارٹ کے درمیان میچ ڈرا ہوا، دونوں ٹیمیں کوئی گول نہ کر پائیں جبکہ دِن کے آخری میچ میں مائنز نے نیورن بیرگ کو صفر کے مقابلے میں ایک گول سے ہرایا۔
بنڈس لیگا کے پوائنٹس ٹیبل پر اس وقت لیورکوزین چھبیس پوائنٹس کے ساتھ سرفہرست ہے، دوسرے نمبر پر بریمن ہے۔ تیسری پوزیشن ہیمبرگ کے پاس ہے۔ شالکے چوتھے اور وولفسبرگ پانچویں نمبر پر ہے۔
رپورٹ: ندیم گِل
ادارت: کشور مصطفیٰ