بنڈس لیگا: ڈورٹمنڈ پہلی پوزیشن پر

دسویں میچ ڈے کے اختتامی روز پوائنٹس ٹیبل کی دو ٹاپ ٹیموں کے درمیان کھیلے گئے ایک اہم میچ میں ڈورٹمنڈ کے نوجوان کھلاڑی ماریو گوئٹزے نے کھیل کے 26 ویں منٹ میں پہلا گول کرکے اپنی ٹیم کو برتری دلادی۔ کھیل کے 67 ویں منٹ میں ہونے والے دوسرے گول میں بھی گوئٹزے نے اہم کردار اداکرتے ہوئے ایک بہترین پاس ساتھی کھلاڑی لوکاس باریوس کو دیا جنہوں نے اس موقع سے فائدہ اٹھا کر رواں سیزن کا اپنا پانچواں گول کرکے میچ پر اپنی ٹیم کی گرفت مضبوط کردی۔

یہ فتح سابق بنڈس لیگا چیمپیئن ڈورٹمنڈ کی موجودہ سیزن کے آغاز میں ریکارڈ پانچویں لگاتار فتح ہے۔ اس جیت کے بعد ڈورٹمنڈ کے کوچ یوایئرگن کلوپ کا کہنا تھا، " ہمیں ایک انتہائی مضبوط حریف پر قابو پانا تھا اور ہم اس میں کافی اچھے طریقے سے کامیاب رہے۔" کلوپ سات برس تک مائنز کی ٹیم کے کوچ بھی رہ چکے ہیں۔

اتوار ہی کے روز کھیلے گئے دوسرے میچ میں ہوفن ہائیم کی ٹیم نے مہمان ہینوور کو صفر کے مقابلے میں چار گول سے شکست دی۔ اس فتح کے بعد ہوفن ہائیم بہتر گول اوسط کی بنیاد پر تیسری پوزیشن پر پہنچ گئی ہے۔ جبکہ بائرلیور کوزن تیسرے سے اب چوتھے نمبر پر منتقل ہوگئی ہے۔

بنڈس لیگا کا دسواں میچ ڈے مکمل ہونے کے بعد پوائنٹس ٹیبل کی صورتحال کچھ اس طرح سے ہے۔ پہلے نمبر پر 25 پوائنٹس کے ساتھ ڈوٹمنڈ کی ٹیم ہے جبکہ دوسرے نمبر پر مائنز ہے اور اس کے پاس 24 پوائنٹس ہیں۔ ہوفن ہائیم 18 پوائنٹس کے ساتھ تیسرے جبکہ 18 ہی پوائنٹس کے ساتھ بائر لیورکوزن چوتھے نمبر پر پہنچ گئی ہے۔ پانچویں پوزیشن پر فرینکفرٹ کی ٹیم ہے اور اس نے 16 پوائنٹس حاصل کررکھے ہیں۔

بنڈس لیگا کے گیارھویں میچ ڈے کا آغاز اب جمعہ پانچ نومبر سے ہوگا۔ ہر میچ ڈے کے دوران جمعہ، ہفتہ اور اتوار کے روز میچ کھیلے جاتے ہیں۔

رپورٹ : افسراعوان

ادارت : عابد حسین