بنڈس لیگا، ڈورٹمنڈ نے کولون کو مات دے دی

بنڈس لیگا یعنی جرمن فیڈرل فٹ بال لیگ کے رواں سیزن میں پوائنٹس ٹیبل پر پہلے نمبر پر براجمان بائرن میونخ آج یعنی اتوار کو اپنا ایک اہم میچ ہینوور کے ساتھ کھیل رہی ہے۔ میونخ کی ٹیم نے ابھی تک کل 9 میچ کھیلے ہیں، جن میں سے سات میں اسے کامیابی حاصل ہوئی اور اس کے 22 پوائنٹس ہیں۔ اس میچ میں کامیابی کے ساتھ میونخ کی پوزیشن مزید مستحکم ہو سکتی ہے۔ ہینوور اس وقت پوائنٹس ٹیبل پر آٹھویں نمبر پر ہے اور اس کے پوائنٹس 15 بنتے ہیں۔

اتوار کو بنڈس لیگا کے سلسلے میں کھیلے جانے والے دوسرے میچ میں ٹیبل پر ساتویں نمبر کی ٹیم شالکے نویں نمبر کی ٹیم لیورکوزن کے ساتھ پنجہ آزمائی کرے گی۔ دونوں کے بالتریب پندرہ اور چودہ پوائنٹس ہیں۔ اس میچ میں جو بھی ٹیم کامیابی حاصل کرے گی وہ آگے نکل جائے گی۔

گزشتہ روز یعنی ہفتہ کے دن بنڈس لیگا کے سلسلے میں مجموعی طور پر چھ میچ کھیلے گئے۔ ان میں سے سب سے زیادہ دلچسپ میچ دفاعی چیمپئن ڈورٹمنڈ اور کولون کے مابین رہا۔ اس میچ میں ڈورٹمنڈ کی ٹیم نے کولون کو چاروں شانے چت کر دیا اور پانچ صفر سے کامیابی حاصل کی۔

ڈورٹمنڈ نے مسلسل چوتھے میچ میں کامیابی حاصل کر کے انیس پوائنٹس کے ساتھ ٹیبل پر دوسری پوزیشن سنبھال لی ہے۔ ڈورٹمنڈ نے دس میچ کھیلے ہیں، جن میں سے اس نے چھ میں کامیابی حاصل کی جبکہ تین ہارے اور ایک برابر رہا۔

جرمن وفاقی فٹ بال لیگ کے دسویں میچ ڈے کے دوسرے دن کھیلے گئے دیگر میچوں میں برلن اور مائنز کا میچ صفر صفر، وولفسبرگ اور ہیمبرگ کا ایک ایک سے جبکہ اشٹٹ گارٹ اور نیوریمبرگ کا مقابلہ دو دو گول سے برابر رہا۔ مؤنشن گلاڈ باخ کی ٹیم ہوفن ہائم سے ایک صفر سے ہار گئی اور کائزرز لاؤٹرن نے فرائی برگ کو ایک صفر سے شکست دی۔

دسویں میچ ڈے کے پہلے دن بریمن اور آؤگسبرگ کی ٹیمیوں کے مابین کھیلے جانے والا واحد میچ ایک ایک گول سے برابر رہا تھا۔ اس وقت اشٹٹ گارٹ، بریمن اور مؤنشن گلاڈ باخ کی ٹیموں کے پوائنٹس سترہ سترہ ہیں تاہم گول اوسط کی بنیاد پر یہ ٹیمیں پوائنٹس ٹیبل پر بالتریب تیسرے، چوتھے اور پانچویں نمبر پر موجود ہیں۔

رپورٹ: عاطف بلوچ

ادارت: شادی خان سیف