بنڈس لیگا، میونخ کی ایک اور جیت

بنڈس لیگا کے رواں سیزن کے دوران پوائنٹس ٹیبل پر پہلے نمبر کی ٹیم میونخ نے آوگسبرگ کو شکست دے کر اپنی پوزیشن مزید مستحکم بنا لی ہے۔ اتوار کو کھیلے گئے اس میچ میں میونخ کے اسٹرائیکر ماریو گومز نے جرمن فیڈرل فٹ بال لیگ کے رواں سیزن میں انفرادی طور پر تیرہواں گول اسکور کر کے اپنی ٹیم کو سبقت دلائی۔ انہوں نے یہ گول میچ کے 16ویں منٹ میں کیا۔ گومز نے رواں سیزن کے دوران اٹھارہ میچوں میں بیس گول کرنے کا اعزاز بھی حاصل کر لیا ہے۔

میونخ کی طرف سے دوسرا گول فرانس کے کھلاڑی فرونک ریبیری نے 28 ویں منٹ میں کیا جبکہ آوگسبرگ کی طرف سے میچ کا واحد گول جاپانی اسٹرائیکر Hajime Hosogai نے کیا۔

اندازوں کے برعکس پوائنٹس ٹیبل پر سب سے نچلی یعنی اٹھارہویں پوزیشن پر موجود ٹیم آوگسبرگ نے اچھے کھیل کا مظاہرہ کیا۔ دوسرے ہاف میں میونخ کے مڈ فیلڈر اناطولی تیموش چُک کو فاؤل کھیلنے پر ریفری نے سرخ کارڈ دکھا کے باہر کر دیا۔ بالخصوص جب آوگسبرگ نے 59 ویں منٹ میں گول کیا تو میچ کا باقی حصہ کافی جاندار رہا۔ اس دوران میونخ کی نمائندگی کرنے والے جرمن قومی فٹ بال ٹیم کے گول کیپر مینول نائیر نے انتہائی عمدہ کارکردگی کا مظاہرہ کیا اور ایک یقینی گول بھی روکا۔

میچ کے بعد میونخ کے مڈفیلڈر ٹونی کراؤس نے بھی اعتراف کیا کہ اگرچہ ان کی ٹیم نے پہلے ہاف میں اچھا کھیلا تاہم دوسرے ہاف میں وہ اپنی اتھارٹی برقرار نہ رکھ سکے۔ اس کامیابی کے ساتھ میونخ کے پوائنٹس اٹھائیس ہو گئے ہیں۔ ڈورٹمنڈ، ویردربریمن اور مؤنشن گلاڈ باخ کے تئیس تئیس پوائنٹس ہیں لیکن گول اوسط کی بنیاد پر تینوں ٹیمیں بالتریب دوسرے تیسرے اور چوتھے نمبر پر براجمان ہیں۔

اتوار کو کھیلے گئے دوسرے میچ میں شالکے کی ٹیم پوائنٹس ٹیبل پر دوسرے نمبر پر پہنچنے کے خواب کو شرمندہ تعبیر نہ کر سکی۔ ہینوور اور شالکے کے مابین کھیلا گیا یہ میچ دو دو گول سے برابر ہو گیا۔ شالکے کی ٹیم اس میچ کو ڈرا کرنے کے بعد صرف ایک ہی پوائنٹ حاصل کر سکی اور یوں اب وہ ٹیبل پر بائیس پوائنٹس کے ساتھ پانچویں نمبر پر ہے۔ چھٹے نمبر پر ہنیوور ہے، جس کے پوائنٹس انیس بنتے ہیں۔

رپورٹ: عاطف بلوچ

ادارت: حماد کیانی