بنڈس لیگا: بائرن میونخ پہلی پوزیشن حاصل کر سکتی ہے

بنڈس لیگا میں آج بائرن میونخ کا مقابہ شالکے سے ہو رہا ہے۔ اگر بائرن میونخ یہ میچ جیت جاتی ہے تو وہ فیڈرل لیگ میں دوبارہ پہلی پوزیشن پر آ جائے گی۔ دوسرا میچ بوروسیا ڈورٹمنڈ اور ہینوور کی ٹیموں کے درمیان کھیلا جا رہا ہے۔

بنڈس لیگا میں کل ہفتے کے روز چھ میچ کھیلے گئے۔ کولون نے بائر لیورکوزن کو ایک کے مقابلے میں چارگول سے شکست دی۔ بوروسیا مؤنشن گلاڈباخ نے ہیمبرگ کی ٹیم کو ایک صفر سے ہرایا اور نیورمبرگ اور بریمن کا مقابلہ ایک ایک گول سے برابر رہا۔ ہوفن ہائم کی ٹیم تین ایک کے فرق سے وولفسبرگ کی ٹیم کے خلاف فاتح رہی جبکہ آؤگسبرگ اور ہیرتھا برلن کا میچ دو دو گول سے برابر رہا۔

ہفتے کو کھیلے گئے ایک اور میچ میں کائزرز لاؤٹرن نے مائنز کو تین ایک سے ہرا دیا۔ جمعے کی شب کھیلے گئے ایک میچ میں اشٹٹ گارٹ کی ٹیم نے فرائی برگ کو دو ایک سے شکست دے دی تھی۔

رپورٹ: شامل شمس ⁄  خبر رساں ادارے

ادارت: مقبول ملک