باڑوں کی طاقت
یورپی یونین خار دار تاروں اور دیواروں میں گھرتی جا رہی ہے۔ یورپ کے مختلف ممالک کی جانب سے سرحدوں پر خار دار باڑیں لگانا ایک رواج سا بنتا جا رہا ہے۔ دنیا بھر میں ایسی ہی کچھ باڑوں اور دیواروں کی تصاویر۔
شینگن زون محدود ہوتا ہوا
شینگن زون ایک آزاد سفری معاہدہ بھی ہے۔ اس معاہدے میں شامل ممالک کی سرحدوں پر سفری دستاویزات کی جانچ پڑتال کرنا منع ہے۔ ہنگری کی حکومت نے سربیا کے ساتھ اپنی سرحد پر باڑ نصب کی اور ساتھ ہی یورپی یونین کے رکن ملک کروشیا سے ملنے والی اپنی سرحد کو بھی بند کر دیا حالانکہ ہنگری شینگن زون میں شامل ہے۔ یونان پہنچنے والے زیادہ تر مہاجرین مغربی بلقان کے راستے آسٹریا اور جرمنی آنا چاہتے ہیں۔
یورپ کا بیرونی علاقہ ’میلِیا‘
شمالی مراکش میں ’میلِیا‘ نامی علاقہ اسپین کے انتظام میں ہے۔ اسے دنیا کی جدید ترین سرحد بھی کہا جاتا ہے۔ بالکل ’سیئوٹا‘ نامی علاقے کی طرح، یہاں بھی چھ میٹر اونچی اور دس کلومیٹر طویل دیوار کے ذریعے اسپین کی حدود کو مراکش سے الگ کیا گیا ہے۔ یہاں پر نیٹو کی خار دار تاریں استعمال کی گئی ہیں جبکہ انفراریڈ کیمروں کے علاوہ حرکت اور آواز کو پہچاننے والے آلات بھی نصب ہیں۔
منقسم جزیرہ
قبرص کے منقسم جزیرے کا شمالی حصہ ترک اور جنوبی حصہ یونانی ہے۔ ان دونوں علاقوں کے مابین ایک ’گرین لائن‘ یا سبز لکیر قائم ہے، جو خار دار تاروں، بچی کھچی چیزوں اور ٹوٹی ہوئی دیواروں کے ٹکڑوں کو استعمال میں لاتے ہوئے تعمیر کی گئی ہے۔ یہ 180 کلومیٹر طویل ہے اور کئی سو فوجی اس کی حفاظت پر مامور ہیں۔ دیوار برلن کے انہدام کے بعد نکوسیا دنیا کا آخری منقسم دارالحکومت ہے۔
امریکا اور میکسیکو کے مابین ’دیوار ٹورٹیا‘
ٹورٹیا میکسیکو میں شوق سے کھائی جانے والی ایک ڈش ہے۔ امریکا اور میکسیکو کی سرحد پر قائم اس دیوار کو بھی اسی وجہ سے اس ڈش نے منسوب کیا گیا ہے۔ قریب بیس ہزار امریکی پولیس اہلکار اور رینجرز تقریباً ساڑھے گیارہ سو کلومیٹر طویل اس دیوار کی نگرانی کرتے ہیں۔ منشیات کی اسمگلنگ اور غیر قانونی ترک وطن کو روکنے کے لیے یہاں بھی انتہائی جدید آلات استعمال کیے جاتے ہیں۔
مقدس سرزمین بھی تقسیم
اسرائیلی اور فلسطینی علاقوں میں صرف چند مخصوص حفاظتی چوکیوں کے ذریعے ہی داخل ہوا جا سکتا ہے۔ اس دیوار کا مقصد اسرائیلی علاقوں کو فلسطینیوں کے حملوں سے تحفظ فراہم کرنا ہے۔ تاہم تمام تر نگرانی اور کڑے اقدامات کے باوجود بھی غزہ پٹی کے فلسطینی اسلحہ اور دیگر ہتھیار خود اپنی بنائی ہوئی سرنگوں کے ذریعے اسمگل کرنے میں کامیاب ہو جاتے ہیں۔
دونوں کوریاؤں کے مابین ’غیر فوجی علاقہ‘
جنوبی اور شمالی کوریا کے مابین اس علاقے کو دنیا میں سب سے مضبوط اور کڑی نگرانی والی سرحد کہا جاتا ہے۔ یہاں پر ایک ملین سے زیادہ بارودی سرنگیں نصب ہیں اور ساتھ ہی خار دار تاروں کا بھی بے تحاشا استعمال کیا گیا ہے جبکہ نگرانی کے لیے متعدد چوکیاں بھی قائم ہیں۔ 248 کلومیٹر طویل اس دیوار کے دونوں طرف دو کلومیٹر کے برابر ایک ’غیر فوجی علاقہ‘ بھی موجود ہے، جس میں داخل ہونے کی اجازت نہیں ہے۔
آئرلینڈ کی دیوار امن
کیتھولک شمالی آئرلینڈ اور پروٹسٹنٹ جنوبی آئرلینڈ کے درمیان تقریباً 48 امن کی قطاریں یا Peace Lines موجود ہیں۔ بیلفاسٹ میں سات میٹر اونچی دیوار موجود ہے، جو کنکریٹ اور خار دار تاروں سے بنائی گئی ہے۔ اس دیوار کو پیدل اور گاڑی کے ذریعے پار کیا جا سکتا ہے تاہم رات کے وقت تمام گزر گاہیں بند کر دی جاتی ہیں۔
وہ اسے ’حفاظتی دیوار‘ کہتے ہیں
یہ کسی بھی دو ملکوں کی سرحدوں پر تعمیر کی جانے والی طویل ترین باڑ ہے۔ بھارت اور بنگلہ دیش کی سرحد کو تقریباً چار ہزار کلومیٹر خار دار تار بچھا کر الگ کیا گیا ہے۔ اس کی اونچائی تقریباً دو میٹر ہے جبکہ کئی مقامات پر اس میں سے بجلی بھی گزرتی ہے۔ قریب پچاس ہزار فوجی اس سرحد کی نگرانی کرتے ہیں۔
’دیوار برلن ‘ تقسیم کی علامت
ایک طویل عرصے تک ’موت کی پٹی‘ کے نام سے مشہور دیوار برلن نو نومبر 1989ء کو گرا دی گئی۔ اس دیوار کے گرنے کے بعد دوسری عالمی جنگ کے بعد دو حصوں میں بٹ جانے والا جرمنی دوبارہ متحد ہو گیا اور سرد جنگ کا خاتمہ بھی ممکن ہوا۔ تاہم اس دوران رونما ہونے والے تاریخی واقعات کو ہمیشہ یاد رکھا جائے گا۔