بابری مسجد انہدام کی انیسویں برسی

یوں تو بابری مسجد کے انہدام کی برسی کے موقع پر ہر سال سیاسی ماحول گرم ہوجا تا ہے لیکن اس مرتبہ اس میں کچھ زیادہ ہی شدت دکھائی دے رہی ہے اس کی ایک بڑی وجہ یہ ہے کہ اگلے سال ملک کی سب سے بڑی ریاست اترپردیش سمیت پانچ ریاستوں میں اسمبلی انتخابات ہونے والے ہیں اور تمام سیاسی جماعتیں اسے اپنے لیے ایک سنہرے موقع میں تبدیل کرنا چاہتی ہیں۔

کانگریس اور بائیں بازو کی جماعتوں نے الزام لگایا ہے کہ بھارتیہ جنتا پارٹی ہندوؤں کے جذبات کا استحصال کررہی ہے۔ دوسری طرف BJP نے واضح کردیا ہے کہ اس نے رام مندر کی تعمیر کا معاملہ نہیں چھوڑا ہے۔ بی جے پی کے قومی صدر نتن گڈکری نے کہا کہ پارٹی نے رام مندرکے معاملے کو ترک نہیں کیا ہے بلکہ وہ اسے اقتصادی امور جیسے دیگر معاملات کے مقابلے میں کہیں زیادہ اہمیت دیتی ہے۔

بابری مسجد کے انہدام کی انیسویں برسی کو آج قوم پرست ہندو تنظیم RSS اور وشو ہند و پریشد یوم فتح کے طور پر منارہی ہیں جب کہ مسلمان اسے یوم غم کے طورپر منارہے ہیں۔ اس موقع پر مختلف مسلم تنظیموں نے ملک بھر میں دعائیہ تقریبات کا اہتمام کیا جس میں بابری مسجد کی دوبارہ تعمیر کے لیے حکومت سے مطالبہ کیا گیا۔ آج بھارت میں یوم عاشورہ بھی ہے جس کی وجہ سے اس سال حفاظتی اقدامات سابقہ برسوں کے مقابلے میں زیادہ سخت ہیں۔ اس دوران جنوبی ریاستوں کرناٹک اور کیرالہ میں تشدد کے واقعات کی خبریں موصول ہوئی ہیں۔

1992 میں 6 دسمبر کو ریاست اترپردیش کے اجودھیا میں انتہاپسند ہندوؤں نے مغل بادشاہ ظہیر الدین محمد بابر کے سپہ سالار میر باقی کی تعمیر کردہ تاریخی بابری مسجد کو منہدم کردیا تھا ۔ مسجد کے انہدام کے بعد ملک بھر میں فسادات پھوٹ پڑے تھے جس میں 2000 سے زائد افراد ہلاک ہوئے تھے۔ جس وقت بابری مسجد منہدم کی جارہی تھی اس وقت قوم پرست ہندو تنظیم بھارتیہ جنتا پارٹی کے کئی سینئر رہنما بشمول لال کرشن اڈوانی، مرلی منوہر جوشی، اوما بھارتی وغیرہ وہاں موجود تھیں۔ ان کے خلاف کئی مقدمات بھی درج کیے گئے۔ اُس وقت کی کانگریسی حکومت کے وزیر اعظم پی وی نرسمہا راؤ نے بابری مسجد انہدام کی انکوائری کے لیے لبراہن کمیشن قائم کیا تھا۔کمیشن نے اپنی مدت کار میں درجنوں توسیع کے بعد بالآخر پچھلے سال اپنی رپورٹ پیش کردی لیکن اسے اب تک عام نہیں کیا گیا ہے۔

دوسری طرف بابری مسجد کی جگہ پر تعمیر کردہ عارضی رام مندر کی حفاظت پر گذشتہ 19 برسوں کے دوران حکومت کروڑوں روپے خرچ کرچکی ہے۔ سرکاری رپورٹ کے مطابق احاطہ کی باڑھ اور تار لگانے پر ہی تین کروڑ روپے خرچ ہوئے ’سیکورٹی چوکی پر آٹھ لاکھ روپے ‘ نگرانی پر 25 لاکھ روپے خرچ ہوئے جب کہ سلامتی دستوں کی رہائش گاہوں پر بھی کروڑوں روپے خرچ ہوچکے ہیں۔ احاطہ میں بجلی کی سپلائی برقرار رکھنے کے لیے چار لاکھ روپے کی لاگت سے خریدے گئے جنریٹر کے باوجود بجلی پر ماہانہ تین لاکھ روپے خرچ ہورہے ہیں۔ جب کہ سکیورٹی کے لیے بلٹ پروف گاڑیوں کی خریداری پر بھی کروڑوں روپے خرچ ہوئے ہیں۔

اس دوران متعدد رہنماؤں نے بابری مسجد قضیہ کا جلد از جلد حل نکالنے کی اپیل کی ہے۔ انہوں نے بابری مسجد کی اراضی کو تین حصوں میں تقسیم کیے جانے سے متعلق الہ آباد ہائی کورٹ کے گذشتہ سال کے فیصلے کو ناقابل قبول اور بندر بانٹ قرار دیا ہے۔ مسلم رہنماوں نے بھی بابری مسجد انہدام کے قصورواروں کو جلد از جلد سزا دلانے کی اپیل کی ہے۔ ملک کی سب سے منظم مسلم تنظیم جماعت اسلامی ہند کے سکریٹری اعجاز احمد اسلم نے ڈوئچے ویلے سے بات چیت کرتے ہوئے کہا کہ بابری مسجد کا سانحہ ملک کے بیس کروڑ مسلمانوں اور تمام حق و انصاف پسند عوام کے دلوں میں نشتر کی طرح چبھتا رہتا ہے۔ انہوں نے کہا کہ بابری مسجد کو دوبارہ اسی جگہ پر تعمیر کرنا قانون کی بالادستی کا معاملہ ہے اور جب تک بابری مسجد کو دوبارہ اسی جگہ پر تعمیر نہیں کیا جاتا بھارت کے ماتھے سے کلنک کا دھبہ دھل نہیں سکتا ہے۔ انہوں نے امید ظاہر کی ہے کہ ملک کی عدلیہ اس سلسلے میں اپنی ذمہ داریوں کو ادا کرے گی۔

رپورٹ: افتخار گیلانی، نئی دہلی

ادارت: عصمت جبیں