اپا شیرپا نے 21 ویں مرتبہ ماؤنٹ ایورسٹ سر کر لیا

دنیا کی سب سے اونچی چوٹی ماؤنٹ ایورسٹ8 ہزار 848 میٹر بلند ہے۔ یہ چین اور نیپال کی سرحد پر واقع ہے۔ نیپالی کوہ پیما اپا شیرپا کا تعلق بھی اس چوٹی کے قریب تھامے نامی ایک گاؤں سے ہے۔ انہوں نے 1990ء میں پہلی مرتبہ اس چوٹی کو سر کرنے کا کارنامہ انجام دیا تھا۔ اس کے بعد سے شیرپا نے ہر سال اس چوٹی کو سرکرنے کا سلسلہ شروع کر دیا۔ تاہم اس دوران موسم کی خرابی اور نجی وجوہات کی بناء پر انہوں وقفہ بھی لیا لیکن پھر ایک ہی سال میں دو مرتبہ یہ چوٹی سر کر کے حساب برابر کر دیا، جیسا کہ 1992ء میں وہ دو مرتبہ ماؤنٹ ایورسٹ کو زیرکرنے میں کامیاب ہوئے۔

ہر سال دنیا کی اس سب سے اونچی چوٹی کی صفائی کی جاتی ہے کیونکہ مہم جو اسے سر کرنے کی کوششوں کے دوران چوٹی کے مختلف حصوں میں کوڑا کرکٹ چھوڑ آتے ہیں۔ اسی وجہ سے اپا شیرپا نے صرف اس چوٹی کو ہی سر نہیں کیا بلکہ ساتھ ہی اس چوٹی کی صفائی بھی کی ہے۔51 سالہ کوہ پیما گزشتہ تین برسوں سے ایسا کر رہے ہیں۔

ایک اندازہ ہے کہ وہ اور ان کی ٹیم واپسی پر تقریباً پانچ ہزار کلوگرام کوڑا بھی ساتھ لائےگی۔ اس میں ان کوہ پیماؤں کی لاشیں بھی شامل ہوں گی، جو یہ معرکہ سر انجام دینے کے دوران جان سے ہاتھ دھو بیٹھے تھے اور ان کے ساتھیوں کو ان کے مردہ جسم وہیں چھوڑ کر آنا پڑے تھے۔ نیپال کی وزارت سیاحت نے تصدیق کر دی ہے کہ شیرپا چار غیر ملکیوں اور چھ گائیڈز کے ساتھ ماؤنٹ ایورسٹ کی چوٹی پر پہنچ گئے ہیں۔ اس طرح انہوں نے اپنے ہی ریکارڈ کو مزید بہتر کر دیا ہے۔ اپا شیرپا اس کے علاوہ بھی ماؤنٹ ایورسٹ پر پہنچنے کی کئی ناکام کوششیں کر چکے ہیں۔

رپورٹ: عدنان اسحاق

ادارت: عصمت جبیں