امریکی صدر کا بذریعہ بس دیہی علاقوں کا دورہ

امریکہ کے اقتصادی بحران کے حوالے سے امریکی ووٹرز میں بہت سے خدشات ہیں۔ اب جب کہ سن دو ہزار بارہ کے اواخر میں امریکہ کے صدارتی انتخابات کے حوالے سے صدارتی مہم آہستہ آہستہ زور پکڑ رہی ہے، امریکی صدر باراک اوباما کی کوشش ہے کہ وہ امریکی عوام کو قائل کر سکیں کہ ان کی حکومت معاشی بحالی کے لیے ٹھوس اقدامات کر رہی ہے۔ اسی مناسبت سے امریکی صدر بس کے ذریعے امریکہ کی بعض ریاستوں کا دورہ کر رہے ہیں، جن میں مینیسوٹا، آئووا اور الینوئے شامل ہیں۔ اوباما ان ریاستوں کے دیہی علاقوں کے عوام سے ملاقاتیں کر رہے ہیں۔

امریکی صدر باراک اوباما اس دورے کے دوسرے روز خاص طور پر ان اقدامات کا اعلان کریں گے، جس کے ذریعے دیہی علاقوں کے رہنے والوں کے لیے روزگار کے امکانات بڑھائے جا سکیں۔

خیال رہے کہ باراک اوباما نے سن دو ہزار آٹھ کے صدارتی انتخابات میں ان تینوں ریاستوں سے کامیابی حاصل کی تھی تاہم اب حالات تبدیل ہو چکے ہیں۔ معاشی بحران کے باعث امریکی رائے دہندگان میں حکومتی پالیسیوں کے بارے میں خدشات پائے جاتے ہیں۔ صدر اوباما غالباً انہی خدشات کو دور کرنے کے لیے یہ دورہ کر رہے ہیں۔ وائٹ ہاؤس کے مطابق باراک اوباما کے اس دورے کا مقصد لوگوں کی رائے جاننا اور ان کو سننا ہے تاکہ امریکی معیشت کو مضبوط بنانے کے لیے اقدامات کیے جا سکیں۔

منگل کا دن اوباما آئووا میں گزاریں گے اور وہ چھوٹے کاروبار کرنے والوں کے لیے تین سو پچاس ملین ڈالر کے پیکج کا بھی اعلان کریں گے۔

خیال رہے کہ ریپبلکن جماعت کے لیے صدارتی امیدوار کی دوڑ میں ٹیکساس کے گورنر رک پیری شامل ہو گئے ہیں۔

رپورٹ: شامل شمس⁄ خبر رساں ادارے

ادارت: امتیاز احمد