افغانستان، امریکی جہاز تباہ تین فوجی ہلاک
9 اپریل 2010نیٹو کے فوجی ذرائع کا کہنا ہے کہ امریکی ایئر فورس کا ایک جہاز صوبہ زابل سے گیارہ کلومیٹر جنوب میں قلات شہر کے قریب حادثے کا شکار ہوا تاہم فوری طور پر اس واقعے کی وجوہات معلوم نہیں ہوسکیں۔
ادھر صوبہ قندوز کے گورنر محمد عمر کا کہنا ہے کہ ان کے صوبے میں طالبان کے خلاف امریکی فوج کی کارروائی میں مارے جانے والے تین افراد میں طالبان کمانڈر "ملا گئے" بھی شامل ہیں۔ گورنر کے مطابق آج جمعہ کے روز جرمن فوجی کیمپ کی طرف جانے والی سڑک پر ہونے والےایک ریموٹ کنٹرول بم دھماکے میں جرمنی کے فوجیوں کی ایک گاڑی تباہ ہو گئی تاہم اس واقعے میں کوئی جانی نقصان نہیں ہوا۔ دو اپریل کو بھی جرمن فوجیوں پر طالبان کے حملے میں تین فوجی ہلاک ہو گئے تھے۔ افغانستان کے صوبہ تخار میں پولیس کےصوبائی سربراہ شیر احمد کا کہنا ہےکہ افغان پولیس نے فائرنگ کے تبادلے میں دو طالبان کو ہلاک کر دیا ہے جبکہ پولیس کے تین اہلکار زخمی ہو گئے ہیں۔
رپورٹ : بخت زمان
ادارت : افسر اعوان