آگ لگنے کے واقعات پر سام سنگ گیلکسی نوٹ سیون بند

سام سنگ نے چند ہفتے قبل مارکیٹ سے یہ تمام فون واپس منگوا لیے تھے۔ بتایا جا رہا ہے کہ گرم ہونے پر اس موبائل فون کی بیٹری پھٹ جاتی ہے اور آگ لگ جاتی ہے۔

کوریائی خبر رساں ادارے یُن ہاپ نے پیر کے روز بتایا ہے کہ سام سنگ نے یہ فیصلہ جنوبی کوریا، امریکا اور چین کے حکام کی جانب سے صارفین کی سلامتی سے متعلق تعاون کرتے ہوئے کیا ہے اور اب گیلیکسی نوٹ سیون کی تیاری روک دی گئی ہے۔ سام سنگ کے ایک سپلائر نے نام ظاہر نہ کرنے کی شرط پر بتایا کہ اس سلسلے میں ویت نام میں قائم سام سنگ کی بین الاقوامی سپلائی کا ذمہ دار پلانٹ بھی اب اس فون کی تیاری روک چکا ہے۔‘‘

سام سنگ کی جانب سے فی الحال ان خبروں پر تبصرہ نہیں کیا گیا ہے، تاہم امریکی اخبار ’دی وال اسٹریٹ جرنل‘ نے بھی بتایا ہے کہ نوٹ سیون کی پیداوار روک دی گئی ہے۔

اس سے قبل دنیا کے اس سب سے بڑے موبائل ساز ادارے نے اگست کی 19 تاریخ کو یہ فون متعارف کروایا تھا اور مارکیٹ میں لانے کے صرف ایک ہی ماہ میں ڈھائی ملین موبائل فون صارفین تک پہنچ گئے تھے، جنہیں بعد میں واپس منگوایا گیا۔ اس فون کے حوالے سے مسلسل یہ رپورٹیں سامنے آئی تھیں کہ فروخت کیے گئے چند گیلیکسی نوٹ سیون فون سیٹس کی بیٹری گرم ہونے پر پھٹ پڑی۔ بعد میں ان موبائل کے جگہ دیے گئے فون سیٹس کے حوالے سے بھی یہی خبریں سامنے آئیں تھیں۔

امریکا میڈیا کا کہنا ہے کہ ساؤتھ ویسٹ ایئرلائنز کی ایک پرواز کو اس وقت خالی کرانا پڑا، جب وہاں ایک مسافر کے گیلیکسی نوٹ سیون نے آگ پکڑ لی۔ اس جہاز پر مسافروں اور عملے کے ارکان سمیت مجموعی طور پر 75 افراد سوار تھے، جنہیں جہاز سے نکالا گیا۔ یہ فون اس واقعے سے دو ہفتے قبل متبادل کے طور پر دیا گیا تھا۔