آفریدی کی آئر لینڈ کے دورے میں شمولیت سے معذرت

اسلام آباد سے موصولہ رپورٹوں کے مطابق پاکستان کرکٹ بورڈ نے اس کی وجہ یہ بتائی ہے کہ شاہد آفریدی نے محدود اووروں کے دو میچوں کے لیے اس دورے پر ٹیم کے ساتھ جانے سے معذرت اس وجہ سے کی کہ وہ اپنے بیمار والد کی دیکھ بھال کے لیے وقت دینا چاہتے ہیں۔

پی سی بی کے ترجمان ندیم سرور نے آج بدھ کو بتایا کہ اسٹار آل راؤنڈر شاہد آفریدی کے والد امریکہ کے ایک ہسپتال میں اپنے جگر کا علاج کروا رہے ہیں اور خود شاہد آفریدی بھی اب اپنے والد کی دیکھ بھال کے لیے امریکہ جا چکے ہیں۔

پاکستان کی قومی کرکٹ ٹیم کو اس دورے کے دوران آئر لینڈ کی ٹیم کے خلاف دو ایک روزہ میچ کھیلنے ہیں۔ یہ میچ برطانیہ میں شمالی آئر لینڈ کے دارالحکومت بیلفاسٹ میں 28 اور 30 مئی کو کھیلے جائیں گے۔

پاکستانی کرکٹ بورڈ نے ایک روزہ میچوں کے لیے کپتان کے طور پر شاہد آفریدی کو ابھی گزشتہ ہفتے ہی ان کی ذمہ داریوں سے فارغ کر دیا تھا۔ اس کی وجہ بظاہر ان کی طرف سے ویسٹ انڈیز کے خلاف گزشتہ ون ڈے سیریز کے بعد ٹیم انتظامیہ پر کی جانے والی تنقید بنی تھی۔

آئر لینڈ کے خلاف دو ون ڈے انٹرنیشنل میچوں میں پاکستان کی قیادت مصباح الحق کریں گے، جو ٹیسٹ میچوں کے لیے بھی پاکستانی ٹیم کے کپتان ہیں۔

رپورٹ: عصمت جبیں

ادارت: افسر اعوان