آئیڈیاز 2016، پاکستان کے متعدد دفاعی معاہدے

سابق صدر پرویز مشرف کے دور میں شروع کی جانے والے اس ایونٹ کے نویں سیشن کا افتتاح 22 نومبر کو ایکسپو سینٹر کراچی میں وزیر اعظم نواز شریف نے کیا۔ اس موقع پر ملک کی تینوں مسلح افواج کے سربراہان بھی موجود تھے۔

آئیدیاز 2016ء میں 43 ممالک کی کمپنیاں اور مندوبین شرکت کر رہے ہیں۔

پاکستان نے یوکرائن کے ساتھ ایک دفاعی معاہدہ کیا ہے جس کے تحت پاکستان میں مقامی طور پر تیار کیے گئے الخالد ٹینک سیریز کے لیے یوکرائنی کمپنی انجن فراہم کرے گی۔

پاکستان نے ترکی کے ساتھ تربیتی طیارے مشاق کی فروخت کا معاہدہ بھی کیا ہے جبکہ چین کے تعاون سے تیار کیے گئے جے ایف 17 تھنڈر طیاروں کی اپ گریڈیشن کا معاہدہ فرانسیسی کمپنی سے طے پایا ہے۔ دوسری طرف آگسٹا آبدوز کی اپ گریڈیشن کے لیے پاکستان اور ترکی کے درمیان معاہدے پر دستخط ہوئے۔

نمائش میں سیلف ڈیفنس سے لے کر ملکی دفاع تک مختلف طرح کے ہتھیار اور دیگر ساز و سامان پیش کیا گیا ہے۔

پاکستان کے تیار کردہ بغیر پائلٹ پرواز کرنے والا طیارے بھی نمائش میں رکھے گئے۔ براق نامی ڈرون متحرک ہدف کو نشانہ بنانے کی بھی صلاحیت رکھتا ہے۔

روس، چین، ترکی، یوکرائن، فرانس اور بلیجیم کی اسلحہ ساز کمپنیاں شرکاء کی توجہ کا مرکز ہیں۔

مقامی طور پر تیار کی گئی بم پروف گاڑی پہلی بار نمائش کے لیے پیش کی گئی ہے۔ گیارہ افراد کی گنجائش رکھنے والی گاڑی کو حمزہ کا نام دیا گیا ہے جو نہ صرف کمپیوٹرائزڈ ہے بلکہ اسے زمانہ جنگ کے علاوہ انسداد دہشتگردی کے لیے بھی استعمال کیا جاسکتا ہے۔

پاکستان جنوبی ایشیا میں دفاعی نمائش باقاعدگی سے منعقد کرنے والا واحد ملک ہے۔ دفاعی ماہرین کے مطابق پاکستان کے اسلحہ اور دیگر دفاعی ساز و سامان کا معیار بین الاقوامی معیارات کے مطابق ہے اور اس سے تمام دنیا استفادہ کرسکتی ہے۔