1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Viongozi wa BRICS washindwa kukubaliana

Viongozi wa kundi la nchi zinazoinukia kuwa nguvu ya kiuchumi, leo wameshindwa kukubaliana juu ya pendekezo la kuwa na benki mpya iliotarajiwa kutoa ushindani kwa benki ya dunia inayodhaminiwa na nchi za Magharibi.

Viongozi wa BRICS

Viongozi wa BRICS

Baada ya kuwa na mazungumzo katika mkutano wa BRICS uliomalizika mjini Durban Afrika kusini, viongozi hao wamesema bado kuna majadiliano zaidi ambayo yanahitajika katika kufanikisha mpango huo.

Viongozi wa nchi hizo zinazounda kundi la BRICS yani Brazil, Urusi, India, China na Afrika Kusini, wamesema wamekubaliana juu ya wazo la kuwa na benki itakayokuwa na uwezo wa kuyasaidia mataifa hayo kiuchumi lakini ni lazima kuwe na mazungumzo zaidi ya kufanikisha wazo hilo.

Rais wa Afrika Kusini Jacob Zuma

Rais wa Afrika Kusini Jacob Zuma

Mwenyeji wa mkutano huo rais wa Afrika Kusini Jacob Zuma amesema wameridhika kuwa kuna matumaini ya kuunda benki hiyo. Matamshi yake yanalenga hatua chache zilizopigwa baada ya mkutano uliofanyika New Delhi mwaka mmoja uliopita.

Hata hivyo Zuma amesema kwa sasa wamekubaliana kufanya majadiliano mengine ya kina ili kufanikiwa kuunda benki hiyo.

Mawaziri wa Fedha kukutana

Mawaziri wa fedha kutoka nchi hizo tano ambao wamekuwa wakifanya kazi pamoja kwa muda wa mwaka mmoja uliopita sasa watalazimika kuingia katika majadiliano zaidi ya kuja na mikakati kabambe ya kuendeleza mpango wa kuunda benki hiyo.

Viongozi wa kundi la BRICS

Viongozi wa kundi la BRICS

Kulingana na wanadiplomasia, kundi la BRICS liliazimia kuzindua mpango huo unaohitaji Euro bilioni 50 lakini swala la fedha zitakazochangia kila nchi, miradi itakayoendeshwa na fedha hizo na ni wapi benki hiyo itakapowekwa ni kati ya mambo ambayo yametoa changamoto kubwa katika kuunda benki ya kujitegemea ya kundi hilo.

Kwa sasa ni vigumu kujua ni kiasi gani cha fedha ambacho kila nchi itachangia haswaa baada ya Rais Jacob Zuma kusema kuwa kiwango kitakachotolewa kinapaswa kuwa kiwango ambacho kitaiwezesha benki hiyo kufanya kazi kwa uthabiti.

Akizungumza na shirika la habari la AFP mjumbe wa Urusi aliyeko Afrika Mikhail Margelov amesema ni muhimu kuzungumzia kuhusu miradi itakayoendeshwa na benki hiyo mwanzo badala ya kuanza kujikita katika maswala ya fedha.

Waziri wa fedha wa Brazil Guido Mantega na mwenzake wa China Lou Jiwei

Waziri wa fedha wa Brazil Guido Mantega na mwenzake wa China Lou Jiwei

Hata hivyo katika mkutano huo uliomalizika hii leo kuna maswala mengine ambayo yamefanikishwa kama kuzinduliwa kwa mkutano wa kibiashara kwa mataifa hayo matano ambao utasaidia katika uekezaji na kuinua biashara katika masoko yanayoinukia.

Katika mkutano huo pia mikataba kadhaa ya bishara yalitiwa saini ikiwemo ule kati ya Brazil na China waliokubaliana kufanya biashara pamoja.

Mwandishi Amina Abubakar AFP/ dpa
Mhariri Yusuf Saumu

DW inapendekeza

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com