1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Ukraine: Uholanzi iongoze uchunguzi

Waziri Mkuu wa Ukraine Arseniy Yatsenyuk amesema Uholanzi inapaswa kuongoza uchunguzi wa kubaini aliyeidungua ndege ya shirika la ndege la Malaysia MH17, amesema Kiev iko tayari kusafirisha miili yote nchini Uholanzi.

Eneo ilipoanguka ndege ya MH17

Eneo ilipoanguka ndege ya MH17

Yatsenyuk amesema Uholanzi, nchi ilioathirika pakubwa kwa kuwapoteaza raia wake wengi katika ajali ya MH17 inapaswa kuongoza Uchunguzi, na kwamba wako tayari kukabidhi uratibishaji kwa wenzao wa Magharibi.

"Nasema tena kwamba tuko tayari kutoa ushirikiano juu ya uratibu wa uchunguzi kwa uholanzi, nchi ambayo imeathirika pakubwa katika mkasa huu, na kuishirikisha jamii yote ya Kimataifa." Alisema Yatsenyuk.

Waziri Mkuu wa Ukraine Arseniy Yatsenyuk

Waziri Mkuu wa Ukraine Arseniy Yatsenyuk

Akizungumza na vyombo vya habari mjini Kiev, Yatsenyuk amesema bado Ukraine inaamini ndege hiyo ya abiria ilidunguliwa na wataalamu walio na uwezo wa kutumia kombora la BUK-M1.

Amesema hii inaonesha wazi kuwa makombora ya aina hii hayawezi kutumiwa na waasi wanaoiunga mkono Urusi, huku akiishutumu moja kwa moja Urusi kwa kuiangusha ndege hiyo.

Waziri Mkuu huyo wa Ukraine amesema rais wa Urusi Vladimir Putin anapaswa kuelewa yale aliyoyafanya hadi sasa yanatosha, akimshutumu kwa kutoa silaha kwa waasi wanaopambana na utawala wa Ukraine Mashariki mwa nchi hiyo.

Wataalamu wawasili mjini Kiev

Kwa sasa miili ya 250 iliokusanywa katika eneo la ajali imewekwa ndani ya treni chini ya ulinzi wa wale wanaopigania kujitenga.Kwa upande mwengine wataalamu wawili wa ajali za anga kutoka Ujerumani wamewasili mjini Kiev na wanajaribu kufika katika eneo la ajali.

Baadhi ya waasi wa Mashariki mwa Ukraine wanaotaka kujitenga

Baadhi ya waasi wa Mashariki mwa Ukraine wanaotaka kujitenga

Wajerumani wanne ni miongoni mwa abiria wote 298 waliouwawa baada ya ndege yao kudunguliwa kutoka angani alhamisi wiki iliopita. Kundi la wataalamu kutoka Uholanzi na maafisa kutoka Malaysia pia wamewasili mjini Kiev hii leo asubuhi.

Wakati hayo yakiendelea, yameripotiwa mapiganao karibu na kituo cha treni mjini Donetsk Mashariki mwa Uktraine, moshi mkubwa umeonekana ukifuka kutoka eneo hilo huku waasi wakisema hali hii inafuatia hatua ya serikali ya kutaka kuingia kwa nguvu katika mjini wanaoudhibiti tangu mwezi Aprili.

Inasemekana jumba la ghorofa nane liliharibiwa vibaya katika mapambano hayo huku usafiri ukisitishwa.

Natalya mkaazi wa eneo hilo amesema hii leo asubuhi miripuko ilisikika na kwamba wakaazi wana wasiwasi mkubwa juu ya kuzidi kwa mashambulizi.

Mwandishi: Amina Abubakar/Reuters/AFP

Mhariri: Mohammed Abdul-Rahman

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com