1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Mzozo Mashariki ya Kati wapamba moto

Israel leo imeendelea na mashambulizi yake dhidi ya wanamgambo wa Kipalestina wa chama cha Hamas, katika Ukanda wa Gaza baada ya kushindwa juhudi za Misri, kuzitaka pande hizo mbili husika kusimamisha mapigano.

Athari ya mashambuliui ya angani katika ukanda wa Gaza

Athari ya mashambuliui ya angani katika ukanda wa Gaza

Israel pia imewaambia maelfu ya wakaazi walio mpakani mwa Gaza kuondoka kufuatia mashambulizi zaidi inayoendelea kutekeleza.

Wakaazi Kaskazini mwa miji ya Beit Lahiya, Zeitoun na Shijaiyah ilio karibu na mpaka wa Israel, wamepokea Simu, Ujumbe na Vijikaratasi vinayvoeleza waondoke katika maeneo hayo kuanzia saa mbili hii leo asubuhi au watashambuliwa.

Israel imesema inazilenga nyumba 30 zikiwemo zile za wakuu wa wanamgambo walio na msimamo mkali wa Hamas wakiwemo, Mahmoud Zahar, Jamila Shanti, Fathi Hamas na Ismail Ashkar.

Kulingana na wataalamu wa afya wa Palestina, Idadi ya vifo vya wapalestina ndani ya siku tisa tangu Israel ianzishe mashambulizi yake dhidhi ya Ukanda wa Gaza, ni zaidi ya 200 huku watu 1,450 wakiachwa na majeraha mabaya.

Wanawake na watoto waliohama makaazi yao kufuatia agizo la Israel

Wanawake na watoto waliohama makaazi yao kufuatia agizo la Israel

Upande wa Israel ni mtu mmoja tu aliyeuwawa na wengine kadhaa wamejeruhiwa tangu kuanza kwa mapigano Julai 8, huku wapalestina wakirusha maroketi kuelekea ardhi ya Israel, kutokea Gaza.

Mabomu yalianza tena kuangushwa ukanda wa Gaza siku moja baada ya Israel kukubali pendekezo la Misri la kusimamisha uhasama unaoendelea.

Hatua hiyo ilitarajiwa kufuatiwa na mazungumzo yaliolenga kupatikana kwa suluhu ya muda mrefu ya kusimamisha mapigano.

Lakini Hamas ikaukataa mpango huo na kundelea kurusha mabomu nchini Israel.

Hamas italipa kwa kukataa kusimamisha mapigano asema Netanyahu

Huku juhudi za Misri zikivunjika, Waziri Mkuu wa Israel Benjamin Netanyahu ameonya kuwa Hamas watalipa kwa kukataa pandekezo la kusimamisha mapigano.

"Ingekuwa vyema iwapo tungesuluhisha hali ilivyo kwa njia ya kidiplomasia, na tumejaribu kufanya hivyo kwa kukubali pendekezo la Misri la kusimamisha mapigano, lakini Hamas haijatupa njia nyengine ila kuendelea kutanua na kuzidisha kampeni yetu dhidi yao," amesema Benjamin Netanyahu.

Waziri Mkuu wa Israel Benjamin Netanyahu na Rais wa Palestina Mahmood Abbas

Waziri Mkuu wa Israel Benjamin Netanyahu na Rais wa Palestina Mahmood Abbas

Wakati huo huo shirika la kutetea haki za binaadamu la Human Rights Watch limesema Israel ni lazima isimamishe hujuma zake kwa wakaazi wa Ukanda wa Gaza. Shirika hilo limesema tangu kuanza mapigano wanaouwawa na kuathirika zaidi ni wanawake na watoto.

Mkurugenzi wa Mashariki ya Kati wa shirika hilo llililo na makao yake makuu mjini New York Marekani, Sarah Leah Whitson pia amewataka wanamgambo wa Hamas kuacha kuishambulia Israel.

Rais wa Palestina Mahmoud Abbas anatarajiwa kwenda Misri hii leo kwa mazungumzo juu ya kusimamisha mapigano yanayoendelea.

Mwandishi Amina Abubakar/AP/dpa

Mhariri Mohammed Abdul-Rahman

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com