1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Matukio ya Kisiasa

Maafisa wa serikali ya Syria na Upinzani kukutana ana kwa ana

Serikali ya Syria na upinzani leo wanatarajiwa kukaa kwa mara ya kwanza katika meza moja ya mazungumzo kujadili namna ya kumaliza ghasia nchini humo zilizodumu kwa takriban miaka mitatu.

Mjumbe wa Umoja wa Mataifa na Jumuiya ya nchi za kiarabu Lakhdar Brahimi

Mjumbe wa Umoja wa Mataifa na Jumuiya ya nchi za kiarabu Lakhdar Brahimi

Pande hizo mbili zinazohasimiana zinatarajiwa kukutana leo katika ofisi ya Umoja wa Mataifa ilioko Geneva, Uswisi, ambako mazungumzo yanaaminika kujikita katika suala la kuachiwa wafugwa na pia uwezekano wa kufungua njia kwenye miji na vijiji kwa wafanyakazi wa kutoa misaada.

Pande hizo mbili zilishambuliana waziwazi katika ufunguzi wa mazugumzo hayo siku ya Jumatano mjini Montreux.

Wajumbe katika mkuano wa Syria mjini Montreux

Wajumbe katika mkuano wa Syria mjini Montreux

Wawakilishi kutoka Damascus walitaka mkutano huo ujikite kujadili kitisho cha ugaidi kutoka kwa makundi yalio na itikadi kali yanayofanya kazi zao ndani ya Syria.

Lakini muungano wa kitaifa wa upinzani Syria ukataka majadiliano yaanze kwa kuzingatiwa kuundwa kwa serikali ya mpito, na kuondoka madarakani kwa rais Bashar Al Assad jambo ambalo utawala wa Assad umetupilia mbali.

Tofauti zaonekana kabla ya mkutano wa ana kwa ana kuanza

Aidha katika mkesha wa kuaza kwa mazungumzo ya leo, Mkuu wa muungano wa Upizani Ahmad Jarba ameutaja utawala wa Assad kuwa ni utawala unaokufa na uliokatili huku maafisa wa Syria wakitilia shaka uhalali wa muungano huo.

Mjumbe wa Syria katika Umoja wa Mataifa Bashar Jaafari

Mjumbe wa Syria katika Umoja wa Mataifa Bashar Jaafari

Imani ya kupatikana kwa hatua Licha ya hayo yote wajumbe wa upinzani wameendelea kuwa na imani kubwa kuwa hatua huenda ikapigwa katika kutafuta suluhu ya kumaliza ghasia ambazo hadi sasa zimesababisha mauaji ya watu 130,000.

" Tunajua kuwa kuelekea njia ya makubaliano ya kisiasa ni ndefu lakini kila safari huanza kwa hatua ya kwanza," Alisema Mjumbe wa upinzani Burhan Ghalioun, alipokuwa na mazungumzo na shirika la habari la ujerumani- dpa.

Iwapo majadiliano ya siku mbili yanayoanza leo yataonesha dalili za mafanikio, wajumbe wa upinzani na wapatanishi watatarajia muda wa majadiliano kuongezwa hadi miezi sita, yakifanyika katika miji tofauti barani ulaya.

Lakhdar Brahimi na Katibu Mkuu wa Umoja wa Mataifa Ban Ki-Moon.

Lakhdar Brahimi na Katibu Mkuu wa Umoja wa Mataifa Ban Ki-Moon.

Aidha Mjumbe wa Umoja wa Mataifa na Jumuiya ya nchi za kiarabu Lakhdar Brahimi, anayetarajiwa kukutana na pande zote mbili kwa muda tofauti hii leo kabla ya kuzishawishi kukutana ana kwa ana, jana alijadilli na pande hizo namna mazungumzo ya leo yatakavyofanyika.

Hata hivyo hakuna taarifa zaidi zilizotolewa juu ya mkutano wake na pande hizo mbili hasimu.

Matarajio ya kufanikiwa kwa mazungumzo hayo ni madogo sana, lakini wanadiplomasia wanaamini kwamba kuzileta pamoja pande hizo mbili kwa mara ya kwanza ni hatua ya mwanzo kabisa muhimu kujaribu kuleta upatanishi na kusitisha mapigano yaliowaacha raia wengi wa Syria bila makaazi.

Mwandishi: Amina Abubakar/dpa/AFP

Mhariri: Mohammed Abdul-Rahman

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com