1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
default

Taarifa ya Habari za Ulimwengu kutoka Idhaa ya Kiswahili ya DW

Habari | 20.11.2017 | 15:00

Zimbabwe hakuna kinachoeleweka

Msemaji wa waziri mkuu wa Uingereza Theresa May amesema rais Robert Mugabe wa Zimbabwe amepoteza uungwaji mkono wa watu wa Zimbabwe.James Slack amesema bado hawajafahamu nini kitatokea nchini Zimbabwe lakini kinachodhihirika ni kwamba Mugabe ameshapoteza uungwaji mkono wa wananchi na chama chake.Slack akizungumza na waandishi wa habari amesema Uingereza inatowa mwito kwa Wazimbabwe kujizuia kujihusisha na vurugu na kwamba inataraji kuona amani na azimio mwafaka kutatua hali iliyopo.Mugabe amepuuza muda wa mwisho aliopewa na chama chake ajiuzulu na badala yake ameendelea kubakia madarakani.Wanachama wa ZANU PF wanakutana katika mazungumzo kuhusu kumuondowa madarakani kiongozi huyo wa muda mrefu.Bunge la Zimababwe linafunguliwa kesho Jumanne ambapo Mugabe atakabiliwa na kura ya kumuondowa madarakani. Mawaziri wa serikali wametakiwa kuendelea na shughuli zao kama kawaida huku kukiwa na hali ya sintofahamu ya kisiasa ikiendelea.Kiongozi wa Upinzani Morgan Tsangirai amesema kukaa kuondoka madarakani Mugabe kumewavunja moyo wazimbabwe na kutowa mwito wa kuanzishwa mchakato wa kisiasa utakaowajumuisha wote.

Watu wawili wauwawa Kenya

Takriban watu wawili wamepoteza maisha kufuatia maandamano ya upinzani nchini Kenya baada ya kutangazwa uamuzi wa mahakama ya juu uliounga mkono ushindi wa rais Uhuru Kenyatta kufuatia uchaguzi wa marudio uliofanyika Oktoba 26.Mkuu wa jeshi la polisi kanda ya Kibera Enoch Maloba amethibitisha kwamba mmoja wa waandamanaji alipigwa risasi na kuuwawa na polisi wa kukabiliana na vurugu katika eneo hilo la mji mkuu Nairobi.Na katika eneo la Magharibi mwa nchhi hiyo katika kaunti ya Migori mkuu wa polisi kanda hiyo Joseph Nthenge amesema mtu mmoja pia ameuwawa kwa kupigwa risasi na polisi wa kuzuia vurugu waliokuwa wakipambana na waandamanaji waliofunga barabara. Hadi sasa rais Uhuru Kenyatta hajatowa hotuba yoyote kuhusu uamuzi huo wa mahakama.Muungano mkuu wa Upinzani umetowa mwito wa utulivu.

Rais Ujerumani atowa mwito wa vyama kutafakari tena

Rais wa Ujerumani Frank Walter Steinmeier amevitolea mwito vyama vya kisiasa kutafakari tena misimamo yao na kutafuta maridhiano ya kuunda serikali. Steinemeier ametowa rai hiyo saa chache baada ya mazungumzo ya kuunda serikali kuvunjika na kuitumbukiza nchi kwenye mgogoro.Rais huyo wa Ujerumani amesema kwamba kuunda serikali siku zote ni mchakato ambao sio rahisi na ni suala la nipe nikupe.Chama cha Social Demokratic SPD kwa mara nyingine kimekataa kuunda serikali mpya na muungano wa kihafidhina wa Kansela Merkel na badala yake chama hicho kimetaka kuitishe uchaguzi mpya.Kiongozi wa chama hicho Martin Schulz amesisitiza tangu baada ya uchaguzi wa Septemba 24 kwamba chama chake cha siasa za wastani za mrengo wa kushoto kitabakia upinzani ili kujipanga baada ya kupata matokeo mabaya kabisa ya uchaguzi ambayo hayajaonekana tangu mwaka 1949.

Uturuki na Marekani zaingia kwenye mvutano mpya

Serikali ya Uturuki imeitaja kesi inayoendeshwa nchini Marekani dhidi ya raia wake kuwa ni njama dhidi ya Uturuki na kwamba watuhumiwa wanashikiliwa kama mateka.Kesi hiyo pia imeingiliwa na rais Recep Tayyip Erdogan.Msemaji wa serikali ambaye pia ni naibu waziri mkiuu Bekir Bozdag amesema baada ya mkutano wa baraza la mawaziri ulioongozwa na rais Erdogan kwamba kesi hiyo ni ya kisiasa kwa namna zote. Reza Zarrab mmwenye uraia wa Kituruki na Iran na Mehmet Hakan Atilla ambaye ni naibu mkurugenzi mtendaji wa taasisi ya fedha ya ukopeshaji ya Uturuki ya Halk wanashikiliwa nchini Marekani kwa tuhuma za kukiuka vikwazo dhidi ya Iran.Raia hao wa Iran watafikishwa mahakamani Novemba 27.Tayari maafisa wa Uturuki wanashutumu kwamba waendesha mashtaka wanaohusika katika kesi hiyo wana mafungamano na ulama wa kiislamu Fethullah Gulen.

Mamilioni ya Wayemen kufa kwa njaa

Mkuu wa shirika la mpango wa chakula duniani WFP nchini Yemen amesema kwamba mamilioni ya wayemen wanakabiliwa na kitisho cha kukabiliwa na vifo zaidi wakati ambapo utoaji wa msaada unashindwa kuwafikia watu wanaohitaji kwasababu ya kuendelea kwa vizuizi katika nchi hiyo inayokabiliwa na vita vinavyoendeshwa na muungano wa kijeshi unaoongozwa na Saudi Arabia.Stephen Anderson amezungumza na shirika la habari la Associated Press kutoka Sanaa amesema ni hali ya kuvunja moyo kwamba mamilioni ya Wayemen wanaishi kwa kutegemea msaada wa kibinadamu.Ndege za kusafirisha msaada wa kibinadamu katika maeneo ya Kaskazini yanyodhibitiwa na waasi yameharibiwa kabisa huku pia kukiwepo vizuizi vilivyowekwa na muungano wa kijeshi kama hatua ya kujibu hatua ya waasi ya kufyetua kombora karibu na mji mkuu wa Saudi Arabia Riyadh mapema mwezi huu.

Lebanon yasema haiungi mkono ugaidi

Rais wa Lebanon Michel Aoun amesema nchi yake haiwezi kukubali tuhuma kwamba serikali yake ni mshirika katika vitendo vya ugaidi.Rais Aoun ametowa kauli hiyo baada ya muungano wa nchi za kiarabu Arab League kuwatwika jukumu la kuhusika na ugaidi na kusema kwamba kundi la Hezbollah lilikuwa ni sehemu ya serikali ya Lebanon. Rais Aoun ameonekana kulitetea kundi la Hezbollah akisema kupitia ukurasa wake wa Twita baada ya kukutana na katibu mkuu wa muungano huo wa nchi za Kiarabu Ahmed Abdul Ghait mjini Beirut kwamba Lebanon ina haki ya kujitetea dhidi ya kile alichokiita hatua ya Israel ya kuendelea kuilenga Lebanon.

Watoto waandama na umasikini mkubwa duniani

Kiasi ya watoto milioni 180 katika nchi 37, wana uwezekano wa kuishi katika umasikini mkubwa , kutopata nafasi ya elimu au kukumbwa na kifo kibaya , kuliko ilivyokuwa miaka zaidi ya 20 iliopita. hayo ni kwa mujibu wa ripoti ya Shirika la watoto la umoja wa mataifa-UNICEF iliotolewa hii leo. Mchafuko, migogoro na utawala mbaya ni miongoni mwa sababu kubwa za kuanguka kwa kiwango cha maisha kwa kila mtoto moja kati ya 12, miongoni mwa watoto bilioni2.2 duniani. Hali mbaya imeshuhudiwa Sudan kusini iliomo katika umwagaji damu na ambako hali za watoto ni mbaya zaidi, kuliko kizazi kilichotangulia nchini humo. Ripoti hiyo ya UNICEF imetolewa katika siku ya watoto duniani, inayoadhimisha siku ambapo Umoja wa mataifa ulipitisha waraka wake kuhusu haki ya mtoto mwaka 1989.

Sikiliza sauti 09:45