1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Miaka 50 ya DW Kiswahili

Hongereni DW

Ninaishika kalamu, shairi kulitongoa Kuyaghani ya muhimu, kuhusu yetu idhaa Radio yetu timamu, habari yatangazia Idhaa ya Kiswahili, Redio Ujerumani

Wettbewerb zum 50-jährigem Jubiläum. Musa Jafari Banji Dar Art Youth (Day) P.O. Box 79505 Dar es Salam, Tanzania 0716088888

50 Jahre Kisuaheli Redaktion Wettbewerb

Imetimia hamsini, miaka ya kuzaliwa
Sauti Ujerumani, Kiswahili kuenziwa
Lugha hii ya thamani, ni fahari kutumiwa
Idhaa ya Kiswahili, Redio Ujerumani

Mambo yanayotokea, vipindi kutwelimisha
Makala za kuvutia, nzuri kufikirisha
Kila pembe za dunia, matukio kutupasha
Idhaa ya Kiswahili, Redio Ujerumani

Vipindi bora murua, matangazo maridhawa
Katu hamkubania, kwa uwazi mwasifiwa
Akili 'litufungua, maarifa yengaziwa
Idhaa ya Kiswahili, Redio Ujerumani

Haki mnaihubiri, bila woga wala haya
Ya kweli mwayabaini, uongo kuuzomeya
Mwayaanika dhahiri, mazuri nayo mabaya
Idhaa ya Kiswahili, Redio Ujerumani

Uhuru demokrasi, mumekuwa watetezi
Kaumu kadamnasi, sauti ya ukombozi
Arabuni na Urusi, mnapinga uonezi
Idhaa ya Kiswahili, Redio Ujerumani

Makala za mazingira, tamaduni, jinsia
Mijadala ya kung’ara, kwayo fora mnatia
Uchambuzi wenye dira, vinara mumebobea
Idhaa ya Kiswahili, Redio Ujerumani

Michezo, siasa na dini, kiu yetu mwaizima
Sanaa na burudani, kwa ladha ya kuzizima
Nyimbo tamu sikioni, na midundo ya magoma
Idhaa ya Kiswahili, Redio Ujerumani

Tunafaidi makala, za afya na malezi
Kazi yenu ni muwala, kwa marefu na ujazi
Inameta kwa jamala, tafakari tunduizi
Idhaa ya Kiswahili, Redio Ujerumani

Ulaya na Afrika, napo kote Bara Hindi
Karibini Amerika, vinasikika vipindi
Kwa muda na uhakika, vimepikwa kwa ufundi
Idhaa ya Kiswahili, Redio Ujerumani

Hongera nazimimina, Redio Ujerumani
Matangazo ya kufana, ubora uso kifani
Yenu ni kubwa dhamana, nawapa taji la shani
Idhaa ya Kiswahili, Redio Ujerumani.

Nawapa taji la shani, hamsini kutimiza
Na Mungu awaauni, dira msijepoteza
Mbakie kileleni, Kiswahili kueneza
Idhaa ya Kiswahili, Redio Ujerumani.

Tanbihi: Shairi hili limeandikwa na Emmanuel Marwa (Msemakweli-Mbiu ya Ushairi) wa Mufindi Iringa, Tanzania na picha imechorwa na Musa Jafari Banji wa Dar es Salaam, Tanzania, kwa ajili ya maadhimisho ya miaka 50 ya DW.

Mhariri: Mohammed Khelef

Sikiliza Matangazo Yetu

Unaweza kusikiliza matangazo yetu hapa

Kusikiliza matangazo ya Idhaa ya Kiswahili ya DW, tafadhali bonyeza alama ya spika ya masikioni hapo chini, na kuwasiliana nasi, tafadhali tuandikie moja kwa moja kupitia: kiswahili@dw.com