1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Evropa

Vendosje kontakti me britanikët

Kur kryeministri britanik David Cameron do të qendrojë këtë të premte për një vizitë te kancelarja Merkel, ai do të kërkojë mbështetje për reforma në BE. Cilat përbashkësi janë të mundura dhe sa i ndan të dyja kombet?

Berlini politik pret me vëmendje të mësojë si e përfytyron saktësisht David Cameroni një BE të reformuar. Ministri i Jashtëm britanik, Philipp Hammond ka kërkuar gjithsesi në BBC që të hartohet një paketë "substanciale reformuese", përndryshe "ne nuk do ta fitojmë referendumin". Në një kohë që në një sërë shtetesh të BE - midis tyre edhe në Francë, Cameronin e shohin në mënyrë shumë kritike, kryeministri britanik në Berlin mund të llogarisë padyshim qëndrim të hapur ndaj tij.

Eurodeputeti kristjandemokrat gjerman, David McAllister, i cili ka edhe nënshtetësinë britanike, thotë në bisedë me DW: "Në përgjithësi ekziston një gatishmëri e madhe në Gjermani për t'iu përgjigjur pozitivisht propozimeve britanike." Vendimtare janë detajet. Duhet të verifikohet "çfarë është e mundur të bëhet në kuadër të marrëveshjeve evropiane". Reformat që e bëjnë BE "më efektiv dhe më pak burokrat" janë të mirëpritura për McAllisterin.

Shumë përbashkësi

Përbashkësi midis Gjermanisë dhe Mbretërisë së Bashkuar dhe midis qeverive përkatëse i thekson edhe Martin Callanan, i cili deri në vitin 2014 ishte shef i konservatorëve britanikë në Parlamentin Evropian dhe që atëherë është si Baron Callanan anëtar në Dhomën e Lartë të Parlamentit Britanik. Para së gjithash në politikën ekonomike, thotë Callanan për DW, konservatorët britanikë dhe kristjandemokratët gjermanë besojnë në "shumë gjëra të ngjashme: në tregjet e hapura, në tregtinë e lirë dhe në një buxhet solid. Ne kemi shumë gjëra të përbashkëta me Berlinin"- në dallim nga Franca "socialiste, intervencioniste".

Callanan thotë se "Cameroni thotë atë që thonë shumë njerëz". Pakënaqësia me BE nuk është vetëm "një fenomen britanik". Kështu që qeveria britanike e sheh veten si hapëse rrugësh të reja. Reformat e synuara të BE janë "në interes të të gjitha shteteve anëtare", tha Mbretëresha në fjalimin e saj në fron, duke i shkëputur këto nga programi i qeverisë së Cameronit.

Ndryshimi i Marrëveshjeve është i vështirë

Po sa larg do të shkonin reformat? Një hendek i madh do të ishte ndryshimi i Marrëveshjeve Evropiane, për të cilat duhet të bihen dakord të gjitha shtetet anëtare, në disa vende madje duhet të pyeten edhe qytetarët në referendume. Politikani gjerman David McAllister beson se "së afërmi nuk do të ketë hapësirë për një reformim të gjerë të Marrëveshjeve. Prandaj "duhet parë si mund të plotësohen pretendimet britanike në kuadër të marrëveshjeve ekzistuese".

Një kufi kancelarja Angela Merkel hoqi në pesë liritë bazë të tregut të brendshëm, ku bën pjesë edhe liria e lëvizjes të punëmarrësve, pra zgjedhja e lirë e vendit të banimit dhe e vendit të punës në shtetet e BE. Këto arritje ajo i deklaroi si tabu. Komisari i BE, Günther Oettinger tha në Deutschlandfunk se BE është i gatshëm që të mos i shfrytëzojë të gjitha kompetencat e tij, por një rikthim formal i kompetencave në nivel nacional nuk do të ndodhë.