1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Ballkani

Tronditet qeveria e Tiranës

Kryeministri Berisha pranon dorëheqjen e Ministrit të Mbrojtjes, Fatmir Mediu por deklaron se ai nuk do ta japë. Tri ditë pas shpërthimit tragjik të predhave në Gërdec të Vorës, vala goditëse kap qeverinë e Tiranës

Gërdec

Gërdec

Kryeministri Berisha pranoi mbrëmë dorëheqjen e ministrit të Mbrojtjes Fatmir Mediu, i cili në deklaratën e rastit e quajti atë "një akt të përgjegjësisë së tij morale por jo ligjore" për katastrofën që vrau 16 vetë, plagosi më shumë se 300 të tjerë dhe ktheu në gërrmadha shtëpitë e banorëve të zonës.

Gërdec shpërthimit

Gërdec shpërthimit

Por kryeministri Berisha la të kuptohet qartë se ai vetë nuk mendon të japë dorëheqjen. Përkundrazi ai tha mbrëmë se " mendoj në çdo moment sesi të kufizoj në maksimum pasojat e asaj fatkeqësie të rëndë. Jam tërësisht i vendosur t´u përgjigjem të gjitha pasojave të dëmit."

Opozita dhe banorët e fshatit Gërdec të Vorës, fajësojnë qeverinë për shpërthimin e predhave dhe pasojat e tij katastrofike. Por kryeministri Berisha tha mbrëmë se ai nuk ishte në dijeni se fabrika e çaktivizimit të municioneve që vinin nga gjithë Shqipëria në Gërdec, ishte shumë pranë një zone të banuar.

Ushtria evakuon të plagosurit në Gërdec

Ushtria evakuon të plagosurit në Gërdec

Sa për kërkesën e opozitës për dorëheqjen e tij kryeministri e quajti atë mbrëmë të natyrshme për një shoqëri demokratike si Shqipëria por la të kuptohet se ajo nuk e detyronte atë të japë dorëheqjen. "Opozita në çdo kohë në përputhje me ligjet dhe Kushtetutën e vendit mund të paraqesë të gjitha kërkesat dhe mocionet për kryeministrin, për qeverinë. Mund ta përdorin aksidentin edhe për qëllime politike pasi Shqipëria është një vend i lirë."

Banorët e Gërdecit, të mbetur pa strehë dhe me njerëzit e dashur të vdekur apo të mbetur ende nën rënojat e shpërthimit, paralizuan dje për me shumë se 5 orë trafikun në autostradën Tiranë - Durrës dhe kërkuan largimin e gjithë qeverisë.

Kryeministri Berisha tha mbrëmë se protesta e tyre po politizohej dhe u premtoi se do të rindërtonte sa me shpejt shtëpitë e shkatërruara.

Shpërthimi ndodhi të shtunën e kaluar kur punëtorët po lëviznin municionet e vjetra dhe të dala jashtë përdorimit, të depozituara në bazën e Gërdecit për t´i çaktivizuar ato. Ata ndanin veç e veç lëndën plasëse të predhave nga pjesa e tyre metalike, të cilat më pas shiteshin prej kompanisë shtetërore që i kishte punësuar.

Bilanci i viktimave deri tani është 16 të vdekur dhe 9 të humbur. Në Tiranë hetimet e deritanishme kanë hedhur dyshime për afera korruptive dhe shfrytëzim të punës në të zezë madje edhe të fëmijëve të fshatit Gërdec.

Qeveria e Tiranës filloi para një viti çktivizimin e municioneve të dala jashtë përdorimit, kryesisht sovjetik edhe kineze, të grumbulluara në dekadat e regjimit komunist. Në Shqipëri ka rreth 110 mijë ton municione të tilla. Nxjerrja e tyre jashtë përdorimit është një nga kushtet që Shqipëria duhet plotësojë për të marë një ftesë anëtarësimi për në NATO, që shpreson ta marrë në prill, nga Samiti i Bukureshtit.



DW.COM

  • Data 18.03.2008
  • Autor Ani Ruci / Tiranë
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/DQTw
  • Data 18.03.2008
  • Autor Ani Ruci / Tiranë
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/DQTw