161210 USA Afghanistan

Siç u bë e ditur më parë nga Shtëpia e Bardhë, raporti përmend suksese në luftën kundër talebanëve, paralajmëron në të njëjtën kohë edhe për gjendjen e vështirë të vazhdueshme të trupave atje. Në dhjetor 2009 Obama rriti praninë e trupave amerikane në misionin e Afganistanit në 100.000 ushtarë.

19-vjeçarët Cody Childers dhe Nathan Schultz janë dy viktimat e fundit ndër 88 ushtarët amerikanë që kanë humbur jetën që nga korriku i këtij viti. Fotografitë e tyre dhe të ushtarëve të tjerë të vrarë i botoi gazeta e njohur "Washington Post" në numrin e së shtunës. Shumica e të rënëve janë më të rinj se 25 vjeç, ndërsa më i vjetri është 43 vjeç. Gazeta boton fotografi në intervale të rregullta me fytyrat amerikane të luftës: 1413 vetë deri në fundjavën e fundit.

Deri sa Obama të prezantojë opinionin e tij për gjendjen në Afganistan, ky numër është rritur. Pavarësisht kësaj, qeveria amerikane mendon se ndodhet në rrugën e duhur, siç e bëri të qartë edhe ministri i Mbrojtjes, Robert Gates gjatë qëndrimit të tij të shkurtër në Afganistan javën e shkuar:

"Do të kthehem me bindjen se strategjia jonë po tregon fryte. Do të jemi në gjendje të arrijmë objektivat kryesore, ato që presidenti Obama i ka përcaktuar para një viti."

Në Akademinë Ushtarake "Westpoint" në dhjetorin e vitit të shkuar, Obama kishte bërë të ditur para elitës së re ushtarake se do të rrisë numrin e ushtarëve amerikanë me 30.000 vetë. Njëkohësisht ai përcaktoi edhe qëllimet e misionit:

"Nuk duhet t'i lejojmë Al-Kaidës mundësi tërheqjeje të sigurta. Duhet t'i ndalojmë talebanët dhe të mos u japim asnjë shans të rimarrin pushtetin. Gjithashtu duhet të forcojmë forcat afgane të sigurisë dhe të qeverisë, me qëllim që ato të mund të marrin përgjegjësinë për të ardhmen e vendit të tyre."

Trupat shtesë luftojnë ndër të tjera në provincën Helmand në Jug dhe në Veri, aty ku janë të stacionuar ushtarët e NATO-s. Sukseset ushtarake nuk të entuziazmojnë shumë. Megjithatë ministri i Mbrojtjes, Robert Gates paraqitet relativisht i kënaqur:

"Suksesi i ka tejkaluar pritshmëritë e mia. Sot talebanët kontrollojnë më pak se sa para një viti."

Rreze të vogla drite këto - si për shembull dëbimi i talebanëve nga qyteti Nava në jugperëndim të Afganistanit. Kjo i bën amerikanët të shpresojnë se që në pranverën e vitit të ardhshëm mund të kalohet përgjegjësia tek trupat afgane.

Por trajnimi i trupave afgane të sigurisë po zgjat më shumë se sa ishte parashikuar. Megjithatë suksese të vogla ka edhe në këtë drejtim, i thotë koloneli Art Kandarian radios NPR:

"Ata nuk do të jenë kurrë një ushtri si ajo e Shteveve të Bashkuara, por as nuk është nevoja për një gjë të tillë. Ata janë këtu, gjithmonë krah nesh. Ata - kam parasysh ne - fitojnë këtu çdo lloj beteje.

Por sipas vëzhguesve përfundimi i trajnimit të trupave afgane nuk pritet të marrë fund para 2014-s. Kjo do të jetë një temë në raportin që do të prezantohet në Uashington, po ashtu si talebanët dhe Al-Kaida. Rëndësi e veçantë do t'i kushtohet Pakistanit, gatishmëria e të cilit për të bashkëpunuar, muajt e fundit është rritur.

Autor: Rüdiger Paulert/ Lindita Arapi

Redaktoi: Aida Cama