1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Ballkani

Shtypi gjerman rreth vizitës së kancelares Merkel në Ballkan

Serbët druhen se kancelarja do të sjellë ndonjë ultimatum nga Brukseli në lidhje me grindjen me Kosovën.

default

Angela Merkel në Kosovë

Në gazetën Frankfurter Allgemeine Zeitung në artikullin "Ndërmjet revoltës dhe tërheqjes - Kosova dhe hyrja e Serbisë në BE: Kancelarja gjermane zhvillon bisedime në Beograd" të gazetarit Michael Martens lexojmë:

Në raportin e qeverisë gjermane të publikuar në prill për "strategjinë e përgjithshme për shtetet e Ballkanit dhe gjithë Evropën Juglindore" thuhet, se gjendja e sigurisë në Kosovë është kryesisht e qëndrueshme: "Në qoftë se pas shpalljes së pavarësisë së Kosovës në vitin 2008 ka patur sulme nga serbët e Kosovës në stacionet kufitare ndërmjet Serbisë dhe Kosovës, që atëherë nuk janë shënuar incidente të tjera të rëndësishme destabilizuese." Një tërheqje e pjeshme dukej se ishte e mundur: "Për shkak të përmirësimit të ndjeshëm të situatës së sigurisë Kfor-i do ta reduktojë gradualisht prezencën e tij dhe pas vendimit përkatës të këshillit të NATO-s do ta reduktojë në 2500 ushtarë." Vendimi është parimisht i vlefshëm ende, por shpërthimi i dhunës në korrik ka demonstruar, se reduktimi i atëhershëm i Kfor-it nuk justifikohet, përderisa për veriun nuk është gjetur zgjidhje. Por zgjidhje mund të ketë, kur edhe Beogradi ta mbështesë zgjidhjen, ashtu si Serbia nuk mund të realizojë ambiciet e saj për pranim në BE pa Berlinin. Shkaqe të mjaftueshme për kancelaren gjermane dhe presidentin serb për të biseduar me njëri-tjetrin.

Gazeta "Welt Online" e titullon artikullin e saj: Drojë në Beograd - Angela para portës!

Serbët druhen se kancelarja do të sjellë ndonjë ultimatum nga Brukseli në lidhje me grindjen me Kosovën, shkruan Thomas Roser, dhe vazhdon:

Gëzimi në prag të vizitës së një miku të nderuar nga një shtet partner i fuqishëm ka pamje tjetër. Nuk është e rëndësishme vetëm ajo, që Angela Merkel do të thotë në Beograd, "por është e rëndësishme edhe se çfarë do të thotë Presidenti i Serbisë dhe politikanët e tjerë", përgatit opinionin vendas ministri i Brendshëm, Ivica Dacic, për vizitën e kancelares gjermane. "Ne duhet të japim mesazhin e qartë, se askush nuk duhet ta detyrojë Serbinë, që të duhet të zgjedhë ndërmjet Kosovës dhe BE-së." Edhe politikanë drejtues të partisë proevropiane në pushtet DS, që udhëheq koalicionin e qendrës së majtë në Beograd, mbajnë një qëndrim luftarak ndaj ardhjes së kancelares. Beogradi ka dhënë "maksimalen" për një kompromis në grindjen kufitare dhe tregtare me Kosovën, pohon ministri i Serbisë për Kosovën Goran Bogdanovic: "është iluzion, të presësh prej nesh, që të pranojmë diçka, që është tërësisht në kundërshtim me interesat e shtetit." Prej ditësh mediet serbe spekulojnë, se Merkel do të shkojë me një ultimatum të pakëndshëm për mikpritësit. Për statusin e dëshiruar të kandidatit në BE dhe një afat për fillimin e bisedimeve për pranim Beogradi duhet të heqë dorë nga pretendimet për veriun e Kosovës; Në zonën e banuar nga serbët, ku autoritetet kosovare thuajse nuk kanë asgjë se çfarë të thonë, doganat dhe drejtësia duhet të vendosen nën kontrollin e qeverisë qëndrore të Kosovës.

Në fakt qeveria e drobitur e qendrës së majtë në Beograd për shkak të zgjedhjeve, që po afrojnë dhe thellimit të varfërimit të popullisë, është e interesuar urgjentisht për përparimet në rrugën drejt Brukselit. Por në momentet parazgjedhore çdo qeveri serbe e ka të vështirë të bëjë koncesione në lidhje me Kosovën.

Ndërsa Brukseli e fsheh rritjen e presionit ndaj Beogradit me zgjidhjen e domosdoshmërisë të marrëdhënieve të fqinjësisë së mirë, SHBA flasin hapur që Kosova është një "shtet sovran dhe i pavarur", që ka të drejtën "ta zgjerojë autoritetin në të gjithë territorin shtetëror", deklaroi Philip Reeker, zevëndësndihmësi amerikan i shtetit, në një vizitë të shkurtër. Edhe ndaj pesë anëtarëve të BE, që nuk e kanë njohur shtetin e ri, BE përdor tone më të buta se sa SHBA. Gjermania bën pjesë tek 79 vendet, të cilat në vitin 2008 e kanë njohur pavarësinë e shtetit ballkanik, dhe që nuk janë të interesuara për bisedime të reja për statusin siç kërkohet nga Beogradi.

Autore: Ina Verbica
Redaktor: Pandeli Pani