SHBA merr në pyetje tri të vejat e bin Ladenit
10 Maj 2011
Sipas të dhënave të shumë mediave amerikane Pakistani do t'u lejojë hetuesve amerikanë të kenë kontakt direkt me tri të vejat e bin Ladenit. SHBA shpresojnë që nga hetimet të marrin informacione për aktivitetet e Al Kaidës dhe sidomos për përkrahësit e mundshëm të bin Ladenit në Pakistan.
Të vejat, një jemenite dhe dy gra nga Arabia Saudite, u arrestuan gjatë ndërhyrjes së njësisë speciale amerikane në pronën e bin Ladenit në qytetin pakistanez Abottabad me 2 maj. Ato mbahen të arrestuara nga forcat pakistaneze të sigurisë. SHBA supozojnë se shefi i Al-Kaidës ka mundur të qëndrojë i fshehur për vite me rradhë në Abottabad vetëm me ndihmën e personave të tretë. Presidenti i SHBA-së Barack Obama kërkoi nga Pakistani një sqarim të plotë.
Kryeministri i Pakistanit, Yousaf Raza Gilani, hodhi poshtë spekullimet për bashkëpunimin e mundshëm të shërbimit sekret ISI, apo agjenturave të tjera me bin Ladenin. Akuza të tilla janë "absurde", tha ai. ISI dhe udhëheqja e ushtrisë kanë besimin dhe mbështetjen e plotë të qeverisë, tha kryeministri përpara parlamentit në Islamabad. Për më tepër lufta kundër terrorizmit ka "prioritet kombëtar". ISI ka pasur në të kaluarën kontakt të përsëritur me grupet militante. Supozimet, se shërbimi ka edhe lidhje me bin Ladenin, janë përsëritur shumë vitet e fundit.
Gilani: SHBA ka cënuar sovranitetin shtetëror të vendit
Në të njëjtën kohë Gilani pranoi edhe gabime të forcave të sigurisë. Ato nuk kanë qenë në gjendje të identifikojnë vendndodhjen e Bin Ladenit: "Por ky nuk është vetëm dështimi ynë, por edhe dështimi i shërbimeve sekrete të kësaj bote."
Gilani kritikoi ashpër se qeveria e tij nuk ka qenë e informuar për operacionin e njësive elitë amerikane kundër Osama bin Laden. Në këtë mënyrë SHBA kanë cënuar sovranitetin shtetëror të vendit. Kryeministri u kërkoi amerikanëve që të jenë të kujdesshëm me veprime të mëtejshme të njëanshme. Në qoftë se do të vihen në shënjestër institucione të rëndësishme strategjike (si centralet bërthamore), Pakistani ka të drejtë "që të kundërgodasë me të gjithë fuqinë". "Askush nuk duhet të nënvlerësojë vendosmërinë dhe aftësitë e kombit dhe të forcave të armatosura, për të mbrojtur vendin tonë", deklaroi Gilani.
SHBA nuk do të kërkojë falje për aksionin në Pakistan
Qeveria amerikane e kundërshtoi këtë kritikë. Presidenti Obama ka qenë i bindur për të "drejtën" në operacionin në Abbottabad të Pakistanit, si dhe për "domosdoshmërinë", tha zëdhënësi i Shtëpisë së Bardhë, Jay Carney, në Uashington. SHBA nuk do të kërkojnë falje për këtë aksion. Ndërkohë në SHBA ka shpërthyer një debat i ri për kampin e të burgosurve Guantanamo, pasi të burgosurit, të dyshuar për terrorizëm, nën presionin e metodave të rënda të marrjes në pyetje kanë nxjerrë informacione të rëndësishme në lidhje me bin Ladenin. Prandaj republikanët në opozitë kërkuan, që të mos mbyllet burgu i ngritur nga paraardhësi i Obamës George W. Bush pas sulmeve të 11 shtatorit 2001. Ministri amerikan i Drejtësisë, Eric Holder, e kundërshtoi këtë. Guantanamo do të mbyllet siç është planifikuar, tha Holder gjatë një vizite në Paris. Ai tha se nuk beson, që vdekja e bin Ladenit mund të ndikojë në ndonjëfarë mënyre në momentin e mbylljes së kampit.
Autor: dpa/Angjelina Verbica
Redaktor: Pandeli Pani