1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Gjermania

Reagimet e Berlinit ndaj avarive të rënda në centralet bërthamore në Japoni

Avaritë e rënda të shkaktuara nga cunami në centralet bërthamore në Japoni, kanë pasur një jehonë të fortë në politikën e brendshme në Gjermani. Opinioni publik në Gjermani është më kritiku në vendet e industrializuara.

Kancelarja Merkel dhe zëvendëskancelari Westerwelle, në konferencë për shtyp pas debatit publik rreth katastrofës bërthamore në Japoni. Berlin, 12 mars, 2011.

Kancelarja Merkel dhe zëvendëskancelari Westerwelle, në konferencë për shtyp pas debatit publik rreth katastrofës bërthamore në Japoni. Berlin, 12 mars, 2011.

Megjithëse ende të tronditur nga avaritë e mundshme katastrofale në reaktorët bërthamorë japonezë, politikanët gjermanë kanë rifilluar polemikën e pritur rreth politikës bërthamore. Debati merr krahë edhe nga zgjedhjet për parlamentin e landit në 27 mars në Baden-Vyrtemberg, ku janë në funksionim 17 centrale bërthamorë. Në Filipsburg të këtij landi ndodhet ndër të tjerë edhe një reaktor bërthamor 32 vjeçar me ujë të nxehtë, i të njëjtit tip si reaktori në Fukushima.

I vjetër dhe i rrezikshëm - centrali bërthamor në Filipsburg të Gjermanisë.

I vjetër dhe i rrezikshëm - centrali bërthamor në Filipsburg të Gjermanisë.

Opozita kërkon mbylljen e centraleve të vjetëruar

Kryetari i socialdemokratëve gjermanë në opozitë (SPD) Sigmar Gabriel, kërkoi të dielën (13.3.) nga qeveria gjermane mbylljen e centraleve të vjetër bërthamorë, tek të cilët nuk mund të aplikohen më masat e sigurisë të përcaktuara nga stadi i shkencës dhe i teknikës bashkëkohore: "Centralet më të vjetër bërthamorë gjermanë duhet të nxirren nga rrjeti. Ato janë centrale bërthamore me probleme shumë të mëdha sigurie. Bëhet fjalë pjesërisht për reaktorë me ujë të nxehtë, si ata në Japoni. Vërtet në Japoni shkaktarë ishin tërmeti dhe cunami, por në fund ishte ndërprerja e furnizimit me energji, që shkaktoi probleme. Natyrisht edhe tek ne në Gjermani janë të mendueshme raste kolapsi të furnizimit me energji."

Në të njëjtën linjë u shpreh edhe kryetarja e ekologjistëve gjermanë në opozitë, Claudia Roth: "Prej vitesh ne ekologjistët themi se energjia bërthamore është një teknologji, e cila mbart rreziqe të pakontrollueshme. Tani ndodhi një fatkeqësi e madhe dhe është e tmerrshme të kesh të drejtë, kur sheh tragjedinë në Japoni, e cila ende nuk ka marrë fund. Kjo teknologji nuk është e kontrollueshme nga njeriu. Deklarata se centralet bërthamorë gjermanë janë të sigurtë, dhe fakti që qeveria konservatoro-liberale e ka zgjatur kohën e funksionimit të centraleve më të vjetër bërthamorë (...), tregojnë se çfarë politike të papërgjegjshme, të gabuar dhe të rrezikshme ndjek koalicioni konservatoro-liberal."

Deutschland Atomkraft Die Grünen Claudia Roth und Cem Özdemir in Berlin

Kryetarët e partisë ekologjiste gjermane (Buendnis 90/ Die Gruenen), Claudia Roth dhe Cem Oezdemir kërkojnë mbylljen e centraleve të vjetër bërthamorë në Gjermani.

Teknologjia e energjisë bërthamore mbart rreziqe të pakontrollueshme

Politikani ekologjist dhe ish-ministër i Mjedisit Jürgen Trittin, tha se prej kohësh është e ditur se asnjë central bërthamor në botë nuk është i sigurtë në rast të një shkrirjeje bërthamore. Kjo ka qenë arsyeja kryesore, që koalicioni i mëparshëm qeveritar mes socialdemokratëve dhe ekologjistëve, drejtuar nga Gerhard Schröder, pati negociuar me koncernet energjetike daljen nga energjia bërthamore në Gjermani dhe pati ndaluar ngritjen e centraleve të reja.

Por pasiguria e shkaktuar nga katastrofa e mundshme bërthamore pikëtrisht në vendin e teknologjisë së avancuar si Japonia, me centrale bërthamore të sigurtë, dallohet edhe tek politikanët e qeverisë.

Kancelarja Angela Merkel vërtet i hodhi poshtë kërkesat për ta tërhequr vendimin e qeverisë mbi zgjatjen me mesatarisht dymbëdhjetë vjet të afatit të shfrytëzimit të centraleve bërthamore. Por pas një takimi krize në Berlin kryetarja e Partisë Demokristiane (CDU) paralajmëroi verifikimin e standardeve të sigurisë të të gjitha centraleve bërthamore gjermane.

"Pavarësisht nga fakti, që njoftimet mbi pasojat bërthamore në Japoni janë ende kontradiktore, një gjë është e padiskutueshëm: Ngjarjet në Japoni janë një pikë kthese për botën, sepse shumë njerëz, përfshirë edhe mua, thonë: Kur në një vend si Japonia me kërkesa dhe standarde shumë të larta sigurie me sa duket nuk arrihet të shmangen pasojat bërthamore të një tërmeti dhe të një përmbytjeje, atëherë e gjithë bota, edhe Evropa, atëherë edhe një vend si Gjermania me kërkesa dhe standarde gjithashtu të larta sigurie, nuk mund të qëndrojnë indiferentë."

Zinxhir njerëzish në protestë kundër energjisë bërthamore. Neckarwestheim pranë Stuttgartit, 12 mars 2011.

Zinxhir njerëzish në protestë kundër energjisë bërthamore. Neckarwestheim pranë Stuttgartit, 12 mars 2011.

Protesta kundër energjisë atomike

Ministri i Mjedisit Norbert Röttgen tha, se ai vazhdon ta konsiderojë energjinë bërthamore si teknologji të përgjegjshme për një periudhë kalimtare. Por ngjarjet në Japoni shënojnë një pikë kthese. "Ka ndodhur një ngjarje, për të cilën thuhej gjithnjë se nuk mund të ndodhë, pasi ekzistojnë të gjitha siguritë. Ngjarjet në Japoni e kanë ndryshuar këtë bindje", u shpreh Röttgen. Ministri tha se duhen krijuar mundësisht shpejt alternativa gjithëpërfshirëse në furnizimin me energji.

Disa dhjetëra mijëra vetë demonstruan duke krijuar një varg 45 kilometra me njerëz të nisur nga kancelaria shtetërore në Shtutgart deri tek centrali bërthamor Nekar-Vesthajm për shkëputjen e menjëhershme nga energjia bërthamore. Politikanë të opozitës, shoqata dhe nisma kundër energjisë bërthamore deklaruan, se në fund të fundit edhe në Gjermani energjia bërthamore nuk është e zotërueshme. Në Republikën Federale janë në funksionim gjithsej 17 centrale bërthamore.

Autor: Bernd Gräßler / E.Xhani

Redaktoi: Vilma Filaj - Ballvora

  • Data 14.03.2011
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/10Ylk
  • Data 14.03.2011
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/10Ylk