1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Gjermania

Reagime ndërkombëtare ndaj koalicionit të madh në Gjermani

Disa vende, p.sh. Greqia, ka të ngjarë të jenë jo të kënaqura me marrëveshjen e koalicionit.

Bursat evropiane reaguan pozitivisht ndaj marrëveshjes për koalicion në Gjermani. Kursi i euros u rrit pak, dhe Eurostoxx 50, i cili vlerëson rezervat më të rëndësishme në Evropë, u rrit me 0.2 për qind. Por kjo lidhej ndoshta jo vetëm me përmbajtjen e marrëveshjes së koalicionit, por edhe për faktin se SPD, CDU dhe CSU ranë më në fund dakord mbi pikat kryesore të një qeverie të përbashkët.

Një zëdhënës i presidentit të Komisionit Evropian Hoze Manuel Barroso e përshëndeti marrëveshjen e koalicionit mes CDU/CSU dhe SPD, si një "hap të rëndësishëm", sepse në politikën evropiane nuk mund të merren vendime deri sa të krijohet qeveria e re gjermane.

"Kursime, kursime, kursime" - kjo mbetet deviza për grekët

Në lidhje me vendet evropiane që kanë borxhe në marrëveshjen e koalicionit thuhet se ato do të ndihmohen me para vetëm nëse respektojnë masat e kursimeve dhe vazhdojnë reformat.

Ilias Katsoulis Soziologe in Griechenland

Ilias Katsoulis

E prandaj qeveria greke ka të ngjarë të jetë e pakënaqur, mendon Ilias Katsoulis, politolog në Universitetin Panteion të Athinës. "Kam përshtypjen se Greqia kishte shpresuar se SPD-ja do të angazhohej më fortë në koalicion për një politikë kundër kursimeve." Në një intervistë me Deutsche Welle-n ish-ministri i Jashtëm grek Dimitrios Drucas, i cili është tani deputet në Parlamentin Evropian, e shpjegon politikën e ardhshme gjermane në Evropë me fjalët: "Angela Merkel dhe CDU/CSU arritën të dominojnë plotësisht në këtë pikë. Deviza do të vazhdojë të jetë 'Kursime, kursime, kursime."

Nënshtetësia e dyfishtë dhe Turqia

Gazeta kroate Vecernji List çuditet për lëshimet e mëdha të bëra nga CDU/CSU ndaj social-demokratëve, si paga minimale e përcaktuar me ligj, apo shtetësia e dyfishtë. "Me sa duket konservatorët hedhin poshtë për një koalicion të madh pothuajse të gjitha parimet e tyre," shkruan gazeta kroate.

Emre Gënen nga Instituti Evropian i Universitetit Bilgi në Stamboll thotë në intervistë me DW se lejimi i nënshtetësisë së dyfishtë, prej së cilët mund të përfitojnë në radhë të parë shtetasit turq që kanë lindur në Gjermani, nuk po ndesh ndonjë interes të madh në Turqi.

Për Turqinë dhe mediat turke është interesante në radhë të parë nëse "Angela Merkel do të mbetet kancelare - ky është mesazhi i vetëm që ka rëndësi në Turqi," thotë sociologu Gënen. Dhe kjo jo domosdoshmërisht vetëm në kuptimin pozitiv: "Mediat turke e dinë se Angela Merkel nuk dëshiron që Turqia të jetë në Bashkimin Evropian - kështu që ka pak shpresë që Turqisë mund t'i hapet rruga për në BE sa kohë Merkel është kancelare." Por Gënen mendon se socialdemokratët do të kenë ndikim pozitiv në lidhje me politikën ndaj Turqisë.

Politika ndaj Rusisë

Symbolbild Flaggenkombo Deutschland Russland

Rusia ka të ngjarë të jetë e kënaqur me marrëveshjen e koalicionit: Një kapitull i tërë u kushtohet marrëdhënieve të ngushta ekonomike dhe politike mes Berlinit, Brukselit dhe Moskës.

Vladislav Belov nga Instituti për Evropën i Akademisë së Shkencave të Rusisë thotë se është lajm i mirë që socialdemokratët ndoshta do të bashkëqeverisin: "SPD është partner i sigurt për Rusinë, por edhe CDU/CSU. Këtë e ka treguar edhe koalicioni i dikurshëm, Frank-Walter Steinmeier asokohe ministër i Jashtëm, dhe Angela Merkel - janë politikanë që kanë mirëkuptim të madh për Rusinë."