1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Ballkani

Punonjësit e EULEX-it të gatshëm të nisin punën në Kosovë

Policët e misionit EULEX në Kosovë veshën uniformat me simbolet e misionit dhe janë të gatshëm të nisë punën. KS me një deklaratë presidenciale mbështeti shtrirjen e EULEX-it mbi bazën e rezolutës 1244 të OKB-së.

default

Shefi i misionit ELUEX, Yves de Kermabon takohet me një oficer policie gjatë vizitës në një fshat të Prizrenit më 19 maj 2008

Policët ndërkombëtar të misionit evropian EULEX sot vendosën kapelet në kokë dhe në krah stemat e misionit evropian, një simbolikë kjo për të treguar gatishmërinë e tyre, që të fillojnë punën në fillim të dhjetorit. Në ceremoni mori pjesë edhe shefi i këtij misioni Yves de Kermabon, i cili tha se misioni që ai do të kryesojë do të shtrihet në të gjitha rajonet e Kosovës duke përfshirë edhe veriun e vendit. Yves de Kermabon, tha se ai është i mandatuar nga grupi ndërkombëtar për Kosovën, në të cilin bëjnë pjesë 26 vende, që e kanë njohur pavarësinë e Kosovës, ndërsa, misioni EULEX do të funksionojë nën ombrellën e OKB-së. "Unë për punën time do të raportoj direkt në Bashkimin Evropian, mirëpo do të dërgoj disa raporte edhe në Kombet e Bashkuara sepse ju e dini që tashmë misioni evropian EULEX do të funksionojë në bazë të rezolutës 1244 të KS-it ashtu siç veprojnë edhe forcat paqerujatëse të KFOR-it", tha Yves de Kermabon. Ai tha se nuk do të ketë mision të ndarë në vendbanimet shqiptare dhe ato serbe, por do të ketë vetëm një mision.

"Është shumë e qartë se do të ketë vetëm një mision, një mision për rendin dhe ligjin dhe ai është EULEX-i, i cili do të shtrihet në të gjitha rajonet e Kosovës", tha Yves de Kermabon.


Tashmë është e qartë se misioni i BE-së për policinë dhe drejtësinë do të funksionojë në bazë të rezoluës 1244 të KS-it dhe jo në bazë të Kushtetutës së Kosovës, ashtu sic kërkonte Prishtina zyrtare. Udhëheqësit politikë kosovar sot nuk u paraqitën fare para mediave, për të komentuar përkrahjen që KS-it i dha planin gjashtë pikësh të Sekretarit të Përgjithshëm të OKB-së Ban Ki Mun, i cili konfimon neutralitetin e misionit evropian EULEX në lidhje me statusin e Kosovës. Një ditë para seancës së KS-it ata e refuzuan tërësisht këtë plan. Udhëheqësit politikë kosovar dërguan vetëm telegrame urimi të shkruara për festën e 28 nëntorit ditës së flamurit. Ata thonë se kjo festë në Kosovë sivjet kremtohet me më shumë krenari e gëzim për faktin që po shënohet në Republikën e pavarur dhe sovrane të Kosovës, të njohur tashmë nga 52 vende të botës. Ata thonë se institucionet dhe qytetarët në bashkëpunim të plotë me miqtë e Kosovës do të vazhdojnë të punojnë për forcimin e lirisë, demokracisë dhe ekonomisë së Kosovës, në mënyrë që shteti i ri të dëshmojë se është anëtar i denjë i kombeve të lira.

  • Data 27.11.2008
  • Autor Bekim Shehu
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/G3Qg
  • Data 27.11.2008
  • Autor Bekim Shehu
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/G3Qg