1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Bota

Pesë vjetët e Manmohan Singhit - Bilanci

Manmohan Singh rikandidon sot, në zgjedhjet e 16 prillit, për postin e kryeministrit të Indisë, por kritikët thonë se ai nuk është në gjendje t'i realizojë synimet e parashtruara.

Kryeministri indian Manmohan Singh, dhe Presidentja Sonia Gandhi duke prezantuar programin zgjedhor.

Manmohan Singh rikandidon për postin e kryeministrit të Indisë. Zgjedhjet zhvillohen më 16 prill. Singh dhe Gandhi duke prezantuar programin zgjedhor.

Në zgjedhjet e vitit 2004, shumë pak njerëz prisnin fitoren e tij. Në fillim të viteteve 90-të, Singh ka qenë ministër i Financave në kabinetin e kryeminsitrit Narasimha Rao, kur India përjetoi një hov të madh ekonomik. Kritikët thonë, se ai nuk i ka aftësitë e duhura për të qenë kryeministër, me shpjegimin se është vetëm dorë e zgjatur e Sonia Gandhit. Por 76-vjeçari i diplomuar në Oksford, qëndroi pesë vitet e fundit në pushtet.

Fushatë zgjedhore në Allahabad e politikanëve të Bharatiya Jata Partei.

Fushatë zgjedhore në Allahabad e politikanëve të Bharatiya Jata Partei.


Sinqeriteti, modestia dhe profesionalieti nuk janë gjithmonë vlerat më të rëndësishme me të cilat mund të mbijetosh në politikën e ashpër të Indisë. Manmohan Singh, thuhet se me zërin e tij të hollë nuk është ndonjë orator i mirë, por është një njeri i përgjegjshëm. Prandaj edhe i mbijetoi shumë krizave gjatë mandatit të tij. Gjysëm viti pas marrjes së pushtetit, në dhjetor të vitit 2004, ndodhi cunami, që shkaktoi vdekjen e 15 000 vetëve në Indi. Bota u befasua kur kryeministri tha se Indisë nuk i duhen ndihma për të përballuar katastrofën. Ky qëndim u vlerësua lart brenda vendit. Me këtë qëndrim u bë e qartë se India ka kapërcyer mentalitetin, sipas së cilit vendi varet prej ndihmave që vijnë nga jashtë. Singh, u detyrua në vitin 2008 të futet në marrëveshjen kontroverse nukleare indo - amerikane. Ndërsa në nëntor të vitit të kaluar, gjatë tri ditëve të dramës së përgjakshme të pengjeve, në Mumbai u vranë më shumë se 160 njerëz.

Fushatë zgjedhore

Njerëzit nuk votojnë vetëm për kryeministrin, por edhe për partinë e tij.

Eksperti për Indinë Christian Wagner, nga Fondacioni për shkencë dhe politikë në Berlin, thotë se Manmohan Singh është një menaxher i mirë krizash. “Lidhur me marrëveshjen nukleare ai ka rrezikuar tërë autoritietin e tij politik, por kjo i ka siguruar një vend në librat e historisë. Edhe reagimi pas sulmeve në Mumbai nuk ishte i keq. Më pas nuk ka pasur ndonjë marrshim trupash. India e ka shfrytëzuar shumë mirë këtë moment të vëmendjes ndërkombëtare për të ushtruar presion diplomatik ndaj Pakistanit, për të sqaruar sfondin e sulmeve. Prandaj sulmi nuk i ka keqësuar edhe më shumë raportet edhe pse mes këtyre dy vendeve aktualisht nuk ka ndonjë dialog të mirëfilltë politik.“

Vitet e kaluara India ka përjetuar një rritje mesatare ekonomike prej 9 përqindësh. Kriza globale e ka prekur edhe këtë vend, por ekspertët thonë se rritja vitin e ardhshëm do të jetë 5 përqind. Ndërkohë që një pjesë e popullsisë në vendin 1,1 miliardë banorëash, ka vetura, paisje elektrike dhe shtëpi të mira, pjesa më e madhe e popullit ende jeton në varfëri. Rreth 70 përqind e banorëve jetojnë nga bujqësia. Në statistikat e Bankës botërore thuhet se 27 përqind jeton nën kufirin e varfërisë ekstreme, pra me më pak se një dollar në ditë.

Duke përgatitur qendrat e votimi.

Votat e njerëzve në brendësi të vendit kanë vendosur në të kaluarën se kush do të marrë pushtetin në kryeqytet.

Kryeministri Singh, është përpjekur që këtë gjendje ta kapërcejë me reforma agrare, siç e tha edhe në gusht të vitit 2007, me rastin e 60-jetorit të pavarësisë së Indisë. „Vitet e ardhshme prioriteti ynë do të jetë zhvillimi i sektorit agrar. Unë do të angazhohem që të ardhurat në bujqësi të rriten. Për këtë proram do të ndajë më shumë se pesë miliardë dollarë.“

Votat e njerëzve në brendësi të vendit kanë vendosur në të kaluarën se kush do të marrë pushtetin në kryeqytet. Ekspertja Salma Bava e Universitetit Jawaharlal-Nehru në Delhi thotë, se është vështirë të flasësh për popullaritetin e Singhit. “Është e vërtetë, që më shumë se dy të tretat e banorëve të Indisë jetojnë në thellësi të vendit. Manmohan Singh ka bërë shumë përpjekje të ndryshojë gjendjen e tyre. Mirëpo ata nuk votojnë vetëm për kryeministrin, por edhe për partinë e tij. Askush nuk mund të premtojë se qëndrimi i tij në post do të thotë edhe zgjidhje e shpejtë e problemeve!“

Fitorja në këto zgjedhje do të ishte fitorja e tij e parë e vërtetë dhe jo e dhuruar, si pesë vjet më parë, kur Sonia Gandhi hoqi dorë nga pushteti. Christian Wagner mendon se shansat e Singhit janë të mira. „Manmohan Singh me siguri që nuk do të pavarësohet nga Sonia Gandhi, sepse ajo vazhdon të jetë kryetare e partisë. Por në pesë vitet e fundit ai ka krijuar imazhin e një politikani të besueshëm, që ka mundësuar kandidimin e tij për postin e kryeministrit."

Autor: Priya Esselborn / Bahri Cani

Redaktoi: Aida Cama

  • Data 16.04.2009
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/HY8L
  • Data 16.04.2009
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/HY8L