1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Ballkani

PE: Për Serbinë fillimi i bisedimeve, për Kosovën MSA

Parlamenti Europian kërkon që BE t'i japë të Serbisë sa më shpejt një datë për fillimin e negociatave për anëtarësim, me kusht që Beogradi të vazhdojë reformat e përpjekjet për marrëdhënie të mira fqinjësore.

Hashim Thaçi me Catherine Ashton dhe kryeministrin serb Ivica Daçiq

Hashim Thaçi me Catherine Ashton dhe kryeministrin serb Ivica Daçiq

Komisionit për politikë të jashtme të Parlamentit Evropian (3.12.) do t'i paraqiten të Hënën projektrezolutat për Serbinë dhe Kosovën. Në diskutim është një procedurë e rregullt vjetore, me të cilën Parlamenti Evropian miraton rezolutat për ecurinë e të gjitha vendeve në procesin e zgjerimit dhe jep rekomandime joobligative, por me rëndësi politike, si për vendet, që aspirojnë të bëhen anëtare, ashtu edhe për anëtarët e Bashkimit Europian.

Dialogu vazhdon

Parlamenti Evropian në projektrezolutë përshëndet edhe rivendosjen e dialogut politik në mes të Beogradit dhe Prishtinës. Për të Martën (4.12.) në Bruksel përgatitet raundi i ri i bisedimeve mes kryeministrave të Serbisë dhe Kosovës dhe shefes së diplomacisë evropiane, Catherine Ashton. Më parë në Bruksel do të mblidhet edhe një herë grupi i punës për zbatimin e menaxhimit të përbashkët të kalimeve kufitare (IBM), me qëllim që në takimin në nivel të lartë politik të Martën të arrihet eventualisht në finalizimin e marrëveshjes për fillimin e zbatimit të IBM-së në tri pikëkalime Jarinje, Merdare dhe Konçulj. Roli i EULEX-it në kalimet si dhe pagesat doganore janë ende ndër çështjet e pazgjidhura.

Parlamenti Europian në Strasburg

Parlamenti Europian në Strasburg

Në Bruksel megjithatë pritet, që nga 10 Dhjetori të nisë implementimi i të ashtuquajturit "projekt pilot" për menaxhimin e përbashkët të kalimeve ndërmjet Serbisë dhe Kosovës dhe kjo do të shërbejë si një raport pozitiv lidhur me dialogun, që shefja e diplomacisë së BE-së, Catherine Ashton, do t'i paraqesë në fillim të javës së ardhshme ministrave të Jashtëm të Bashkimit Evropian. Shtetet anëtare të BE do të marrin në konsideratë hapat e mëtejshëm të Ballkanit Perëndimor në rrugën drejt integrimit evropian. Përparimi në marrëdhëniet me Prishtinën dhe zbatimi i marrëveshjeve të arritura ështe një prioritet kyç për vazhdimin e integrimit evropian të Serbisë.

Marrëdhënia e parë kontraktuale mes BE dhe Kosovës?

Në komisionin e Parlamentit Evropian për politikën e jashtme sot do të paraqitet një projekt-rezolutë për Kosovën, në të cilën, ndër të tjera vlerësohet se Bashkimi Evropian mund të vendosë një marrëveshje stabilizimi dhe asociimi (MSA) me Kosovën, pavarësisht nga ndarja e shteteve anëtare lidhur me çështjen e statusit. Për këtë Parlamenti Evropian mbështetet në studimin e fizibilitetit të Komisionit Evropian, i cili vërteton se nuk ka pengesa ligjore për MSA-në me Kosovën, pa paragjykuar qëndrimet e shteteve anëtare lidhur me pavarësinë e Kosovës.

Parlamenti Evropian edhe kësaj radhe i bën thirrje "pesë shteteve anëtare të BE, që nuk e kanë njohur pavarësinë e Kosovës, ta bëjnë këtë." Në të njëjtën kohë projekt-rezoluta kërkon "heqjen e strukturave paralele të shtetit serb në veri të Kosovës", përderisa autoritetet e Prishtinës flasin për "hapa drejt bashkëpunimit më të mirë me pakicën serbe." Parlamenti Evropian shpreh shqetësimin lidhur me gjendjen e sundimit të ligjit dhe mungesën e përparimeve në luftën kundër korrupsionit dhe krimit të organizuar në Kosovë.

Zëvendëskryeministri serb Aleksandar Vuçiç

Zëvendëskryeministri serb Aleksandar Vuçiç

Fillimi i bisedimeve me Serbinë?

Duke përshëndetur dialogun politik midis Beogradit dhe Prishtinës në Parlamentin Europian theksohet se "ndarja e Kosovës nuk është zgjidhje" dhe përshëndetet mbështetja për integritetin territorial të Kosovës, e cila ishte shqiptuar nga Komisioni Evropian në raportin e saj vjetor për strategjinë e zgjerimit. Pritet që shtetet anëtare të Bashkimit Evropian në mes të dhjetorit të shprehen në lidhje me studimin e fizibilitetit të MSA për Kosovën, ndërsa fillimi i bisedimeve për këtë marrëveshje do të varej nga përparimi në dialogun ndërmjet Beogradit dhe Prishtinës. Kështu mund të ndodhë që vitin e ardhshëm në Kosovë të fillojnë negociatat për MSA dhe Serbija të fillojë negociatat për anëtarësim në Bashkimin Evropian.

Kritika Serbisë për ndryshimin e ligjit për Bankën Kombëtare

Në projektrezolutën për Serbinë, që duhet të miratohet në Mars të vitit të ardhshëm, Parlamenti Europian mirëpret angazhimin e qeverisë së re serbe në procesin e integrimeve evropiane. Mirëpritet edhe angazhimi i autoriteteve në Beograd për të luftuar krimin e organizuar dhe korrupsionin.

Për këtë qëllim Parlamenti Evropian rithekson domosdoshmërinë e eliminimit të mangësive në reformën e gjyqësorit dhe pret të shohë "frytet e punës" të zëvendëskryeministrit të Serbisë, Aleksandar Vuçiç. Ashtu si vitin e kaluar Parlamenti Evropian rithekson rëndësinë e "vullnetit politik" në hetimin e 24 privatizimeve të diskutueshme në Serbi, si dhe domosdoshmërinë e zbatimit të plotë të ligjit për financimin e partive politike. Në të njëjtën kohë Parlamenti Evropian kritikon ndryshimin e ligjit për Bankën Kombëtare të Serbisë, që "shkatërron pavarësinë e institucionit" dhe nuk përputhet me kriteret e BE-së.

  • Data 03.12.2012
  • Autor Marina Maksimovic/Angelina Verbica
  • Fjalët kyç Serbia, Kosova, MSA, BE
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/16uoA
  • Data 03.12.2012
  • Autor Marina Maksimovic/Angelina Verbica
  • Fjalët kyç Serbia, Kosova, MSA, BE
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/16uoA