1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Gjermania

Partitë opozitare sjellin këmbime idesh

Kush do të jetë ministri i Jashtëm i Gjermanisë në katërvjeçarin e ardhshëm? E vështirë të parashikohet sepse asnjëri prej koalicioneve tradicionale të qendrës së djathtë a të majtë nuk e ka të sigurt shumicën e votave.

Tre kandidatë kryesorë të opozitës, Westerwelle, Trittin, Lafontaine në një debat televiziv.

Tre kandidatë kryesorë të opozitës, Westerwelle, Trittin, Lafontaine në një debat televiziv.

Guido Westerwelle nga liberalët, Jürgen Trittin nga Të Gjelbrit dhe Oskar Lafontaine nga E Majta, të tre do të dëshironin të merrnin pjesë në qeverinë e ardhshme, por në cilën përbërje?

Kandidati i liberalëve, Guido Westerwelle: "Ne duam t'i japim fund koalicionit të madh. Ne duam të pengojmë krijimin e një qeverie të majtë. Unë do të bëj ç'është e mundur, që zoti Lafontaine të mos ketë ndikim në politikën e Gjermanisë, as në formën e një rezerve pushteti të fshehur”, tha ai. Me fjalë të tjera: Në rast se nuk mjafton për një shumicë konservatore / liberale, ku Merkel do të ishte kancelare e Westerwelle ministër i jashtëm, atëherë Westerwelle do të bëjë ç'është e mundur të marrë në qeveri edhe të Të Gjelbrit, për të krijuar kështu koalicionin me ngjyrat: e zezë, e verdhë dhe e gjelbër, ose siç preferojnë ta quajnë atë mediet në Gjermani, koalicionin xhamaikan.

Vapori nuk arrin deri në Xhamajkë

"Jo," tha kandidati kryesor i Të Gjelbërve, Jürgen Trittin: "Vapori nuk do të mbërrijë deri në Xhamajkë". Qëllimi i Të Gjelbërve është pikërisht të pengojë krijimin e koalicionit mes Unionit Kristiandemokrat e Kristiansocial dhe Liberalëve: "Po qe se do ta arrijmë këtë qëllim, atëherë nuk mund t'u mbajmë shkallët pikërisht atyre, kundër të cilëve luftuam gjatë gjithë fushatës," - argumentoi ai. Roli i pakicës në qeverinë e qendrës së djathtë nuk do t'i pëlqente kurrsesi ish-ministrit të mjedisit në qeverinë kuq-gjelbër Schroeder-Fischer (1998-2005). Por Trittin, i cili në partinë e vet konsiderohet si përfaqësues i klientelës së majtë, nuk përjashton asnjë parti nga bashkëqeverisja, madje as edhe demokristianët e kristiansocialët e kancelares Angela Merkel: "Unë jam politikan realist dhe racional dhe nuk besoj tek djalli," tha ai duke pasur parasysh jo vetëm konservatorët e liberalët, por edhe vetë Oskar Lafontaine-in, i cili për tri partitë e tjera parlamentare mbetet tabu.

Lafontaine nuk pret ndonjë ftesë për bashkëqeverisje

Lafontaine-i vetë e di këtë. Prandaj edhe ai nuk pret ndonjë ftesë për bashkëqeverisje, megjithëse, ndryshe nga fushata e katër vjetëve më parë, ish-kryetari i Partisë Socialdemokrate, këtë radhë duket më i gatshëm për bashkëpunim. "Qëllimi ynë është të ndryshojmë politikën. Po të na jepet rasti për një gjë të tillë, do ta bëjmë, me kusht që të na plotësohen kërkesat, e këto janë për shembull ndryshimi i sigurimit për papunësinë, ndryshimi i sistemit të pensioneve, politika e jashtme, për të cilën me siguri që do të flasim," tha ai.

Debat pa politikë të jashtme

Por dy gazetarët e medieve publike nuk e kishin në listë këtë temë. Kështu Lafontaine nuk arriti të përsëriste kërkesën e tij për tërheqjen e menjëhershme të trupave gjermane nga misionet ndërkombëtare ushtarake nëpër botë, mes të tjerash edhe nga Afganistani e Kosova, kërkesë, e cila për momentin është e parealizueshme. Ndoshta, edhe e E Majta ndryshon pikëpamje në këtë pikë, në se vjen puna deri tek negociatat qeveritare me socialdemokratët e të gjelbrit. Këta të fundit mund t'u japin pak nga përvoja e tyre në vitin 1998: Ndërsa në fushatën elektorale thërrisnin për shpërbërjen e NATO-s, kur filluan bashkëqeverisjen me Schroederin jo vetëm që e hoqën këtë kërkesë nga agjenda, por madje mbështetën edhe operacionin e parë luftarak të gjermanëve në kuadër të NATO-s, bombardimin e Jugosllavisë.

Autor : Anila Shuka

Redaktoi : Aida Cama

  • Data 15.09.2009
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/JgpI
  • Data 15.09.2009
  • Shpërndajeni Dërgo Facebook google+
  • Shtypni Shtypeni faqen
  • Permalink http://p.dw.com/p/JgpI